Inzego z’iperereza n’iza gisirikare mu Burusiya zakoranye zifata abantu bakekwaho kugaba igitero mu kabyirino kari mu nkengero z’umurwa mukuru, Moscow mu ijoro ryakeye. Imibare y’abo cyahitanye yamaze kurenga abantu 115 kandi abandi baracyavurwa.
Amakuru aravuga ko abafashwe bafatiwe mu ishyamba rituranye na Ukraine bashaka kujyayo.
Ibiro ntaramakuru by’Uburusiya bivuga ko nyuma y’iki gitero umuyobozi w’Urwego rw’iperereza ry’Uburusiya rwitwa mu Cyongereza Federal Security Service yahise ahamagara Perezida Putun amuha iyo raporo.
Ikito TAAS gishinzwe itangazamakuru mu Burusiya kivuga ko abantu bane bafashwe bari kugerageza kujya muri Ukraine bavuye mu Burusiya, bafatwa mu rukerera rwo kuri uyu wa Gatandatu taliki 23, Werurwe, 2024.
Nyuma gato y’iki gitero, abarwanyi ba Islamic State batangaje ko ari bo bagabye iki gitero ariko nta rundi rwego rurabyemeza.
Ku rundi ruhande, Abanyamerika bavuze ko hari amakuru bari bamaze iminsi bakusanya yerekanaga ko hari igitero cyategurwaga mu Burusiya ndetse ngo bayasangije iki gihugu.
Babitangarije Associated Press.
Uwabibwiye ibiro ntaramakuru by’Abanyamerika, AP, yirinze kugira byinshi abitangazaho kuko ari amakuru y’iperereza kandi nta mazina ye yatangajwe.
Ku rundi ruhande amakuru aravuga ko abafashwe bose bakomoka muri Tajikistan.
