Umuvugizi w’ingabo za Congo Kinshasa, Maj.Gen Sylvain Ekenge avuga ko hari Abajenerali bafunzwe bakekwaho ibyaha byo guhungabanya umutekano w’igihugu.
Kuri uyu wa Gatandatu yabwiye abanyamakuru ko Umushinjacyaha mukuru mu bya gisirikare yategetse ko abo basirikare babarirwa muri 20 batarekurwa kubera ko bakiri gukorwaho iperereza.
Ati: “Ni ukuri. Ba Ofisiye General benshi na ba Ofisiye bakuru batawe muri yombi, ariko byabaye kubera ibikorwa bikomeye bijyanye n’umutekano w’igihugu.”
Sylvain Ekenge yavuze ko igihe cyo kubafunga cyongerewe bikurikije amategeko kuko byasabwe n’Umushinjacyaha kugira ngo hakorwe iperereza.
Avuga ko abo basirikare bashyizwe ahantu bagenzurirwa, bakaba bahabwa uburenganzira bucagase kuko bakekwaho ibyaha kandi bakaba basanzwe ari ingabo.
Amakuru avuga ko mu bafungiwe muri izo gereza harimo abasirikare bakuru 21 bafite ipeti rya General, muri bo babiri ni bo bahawe igihano, abandi bakaba bafunzwe mu buryo bw’agateganyo.
Ikindi ni uko mu bantu 2, 339 bafungiye muri gereza ya Ndolo, abahamwe n’icyaha ari 630; abandi 1, 524 bafunzwe by’agateganyo.
Muri abo n’abo, abantu 190 batangiye gushinjwa kandi mu bafunzwe bose, 44 ni abagore hakabamo n’abanyamahanga batanu.
Ubuvugizi bw’ingabo za DRC buvuga ko mu basirikare bakuru bafunzwe, harimo abakekwaho guta urugamba ubwo AFC/M23 yafataga imijyi ya Goma na Bukavu.
Abandi baregwa gushaka guhirika Perezida Tshisekedi, hakaba n’abaregwa kunyereza ibyari bigenewe ingabo ku rugamba.
Abavugwa muri ibyo byaha ni Gen. John Tshibangu, Gen Pacifique Masungu, Gen Kiseba André, Gen Mugabo Hassan, Gen Ehonza André, Gen Sikatenda, Gen Yav Philemon n’abandi.
Ifoto: Gen Ekenge
