Umuyobozi Mukuru w’Ikigo cy’Igihugu cy’Ubuzima, Dr Nsanzimana Sabin, yibukije abaturarwanda ko kuba umuntu yarakingiwe COVID-19 bidasobanuye ko adashobora kuyandura cyangwa ngo yanduze abandi, cyane ko hari abamaze gusangwamo uburwayi.

Kuri uyu wa Gatatu Dr Nsanzimana hamwe n’Umunyamabanga wa Leta muri Minisiteri y’Ubuzima Dr Mpunga Tharcisse bagiranye ikiganiro n’abanyamakuru ku miterere y’icyorezo cya COVID-19 mu gihugu.

Dr Nsanzimana yavuze ko mu cyumweru kimwe gusa, ubwandu bushya bwa COVID-19 bwazamutse ku kigero cya 245%, abantu babuze ubuzima bakiyongerae ku kigero cya 25% ndetse abakenera ibitanda kwa muganga bakomeje kwiyongera buri munsi.

Muri iki gihe urukingo nirwo ruhanzwe amaso nk’uburyo buzafasha abantu guhangana na COVID-19, kuko rutuma umuntu adashobora kuremba.

Gusa hakomeje gusabwa ko mu gihe umuntu yakingiwe, akwiye gukomeza kwambara agapfukamunwa, kuko na we ashobora kwandura ndetse akanduza abandi.

Dr Nsanzimana yagize ati “Mu bipimo tumaze iminsi dufata, hagaragaye abantu 400 banduye kandi baramaze gukingirwa. Abakingiwe ntibagomba kwirara bumva ko gukingirwa bikuraho kwandura no kwanduza abandi.”

Abamaze gukingirwa mu Rwanda kugeza kuri uyu wa Gatatu ni 389.832. Hakoreshejwe inkingo za Pfizer na AstraZeneca.

Igerageza ryerekanye ko ziriya nkingo zombi zirinda umuntu wanduye virus ya SARS-CoV-​2 itera COVID-19 kuremba 100%, zikarinda uwanduye kugaragaza ibimenyetso kuri 97% na 76% nk’uko zikurikirana.

Buriya bushobozi ariko bugerwaho iyo umuntu yamaze guhabwa inkingo ebyiri ziteganywa.

Ikindi kibazo gikomeye bagarutseho ni ukwihinduranya kwa Virusi ya COVID-19, aho ubwoko bwa Delta bwagaragaye bwa mbere mu Buhinde buheruka kugaragara muri Uganda na Repubulika ya Demokarasi ya Congo mu gihe hari abantu benshi mu Rwanda bajya muri biriya gihugu.

RwandAir iheruka guhagarika ingendo muri Uganda, ndetse imirenge yose ikora kuri kiriya gihugu abaturage bagomba kugera mu ngo mbere ya saa moya z’ijoro. Akarere ka Rubavu ko gaheruka gushyirwa muri Guma mu Karere.

Dr Nsanzimana yakomeje ati “Tugomba rero gukaza ingamba tukirinda ko iyi Virusi nshya igera mu Rwanda.”

Dr Mpunga we yavuze ko kwiyongera k’ubwandu muri iyi minsi kurimo no kugirwamo uruhare n’abantu bamaze kwirara mu kubahiriza amabwiriza yo kwirinda COVID-19.

Ati “COVID-19 iracyahari kandi abantu ntibagomba kudohoka.”

Kugeza kuri uyu wa Gatatu abantu bari bamaze kwandura mu Rwanda ni 29.175.

Abo imaze guhitana  ni 376.