Ikigo cy’Igihugu cy’Ubuzima, RBC, cyatangaje ko ubwandu bwa malaria ku mwaka bukomeje kugabanyuka kimwe n’imibare y’abahitanwa nayo, ku buryo mu mwaka ushize wa 2020 abazize iyo ndwara bari 148, bavuye kuri 700 mu 2016.
Ni imibare yatangajwe mu gihe kuri uyu wa 25 Mata u Rwanda rwifatanya n’isi mu kurwanya icyorezo cya malaria.
Ni umunsi ufatwa nk’umwanya wo kongera imbaragamu rugamba rwo kurwanya malaria, binyuze mu kugeza mu turere twose uburyo bwo kwirinda no kurwanya malaria.
Ni urugendo ngo mu Rwanda rumaze gutera intambwe ishimishije kubera ubushake bwa Guveirnoma y’u Rwanda, kimwe n’uruhare rw’abaturage muri ibyo bikorwa.
Mu buryo bwakoreshejwe harimo gutera imiti yica imibu mu ngo zitandukanye zo mu turere 12 dutandukanye, twihariye ubwandu bungana na 70%, ndetse serivisi zo kurwanya malaria zegerezwa abaturage ku buryo 56% by’uburwayi bwa malaria buvurwa n’abajyanama b’ubuzima.
RBC yavuze ko bijyanye n’imbaraga zihuriweho zakomeje gukoreshwa, u Rwanda rwagize igabanyuka ry’uburwayi bwa malaria bwavuye kuri 400 ku bantu 1000 mu mwaka wa 2016 bugera ku 148 ku bantu 1000 mu 2020.
Yakomeje iti “U Rwanda rwakomeje kubona igabanyuka ry’uburwayi buva kuri miliyoni 4.8 mu 2017 bugera kuri miliyoni 1.8 mu 2020, n’igabanyuka rya malaria y’igikatu yavuye ku burwayi 18.000 mu 2016 bugera ku 3.000 mu 2020. Impfu zijyanye na malaria zaragabanyutse ziva kuri 700 mu 2016 zigera ku 148 mu 2020.”
Mu 2019 malaria yishe abantu 264 mu basaga miliyoni 3.7 bayirwaye. Ni ukuvuga ko imibare y’abapfa yagabanutse 78% ugereranyije 2016 na 2020, inagabanyukaho 43.9 % ugereranyije 2019 na 2020.
Kugeza ubu icyizere gikomeje kuba cyinshi kubera ko ubushakashatsi buheruka ku rukingo rwa malaria mu bana rwatanze icyizere cya 77%. Ni ubushakashatsi bwakozwe na University of Oxford mu Bwongereza.
Nirwo rukingo rwa mbere rwabashije kurenga intego yashyizweho n’ishami ry’umuryango w’abibumbye ryia ku buzima, yasabye abashakashatsi gukora urukingo nibura rutanga icyizere cyo gukora kuri 75%.
WHO igaragaza ko gutanga uru rukingo byihutirwa cyane kuko nko mu mwaka wa 2019 habaruwe uburwayi miliyoni 229 bwa malaria, mu gihe iyo ndwara ihitana abantu 400 000 buri mwaka. Hejuru ya 90% by’impfu za malaria zibarurwa muri Afurika, benshi bakaba ari abana bato, basaga 265 000.
