Amakipe atandatu yo mu Rwanda niyo yemejwe ko azitabira irushanwa rihuza ayabaye aya mbere iwayo mu bihugu byo mu Karere ka Afurika y’Iburasirazuba, “CAVB Zone V Volleyball Club Championship 2025”.
Amakipe y’abagabo ni Police VC ifite igikombe giheruka, REG VC na Kepler VC, naho ay’abagore ni Rwanda Revenue Authority yatsindiwe ku mukino wa nyuma, Police WVC na APR WVC.
Iri rushanwa rizabera muri Uganda hagati y’itariki 26, Gashyantare kugeza ku ya 4, Werurwe, 2025.
Amakipe umunani niyo azatangwa na Uganda kuko ari yo izakira iyi mikino, ayo akaba ari Sport-S, Nemostars, KAVC na UCU n’andi y’abagore Nkumba, Sport-S, Ndejje na KCCA.
Ibihugu bizayitabira ni u Rwanda, Uganda, Kenya n’u Burundi.
Shampiyona ya Volley muri Afurika igizwe na Zone zirindwi.
Zone ya mbere izakinirwa muri Algeria, ikaba igizwe n’iki gihugu, Libya, Morocco na Tunisia.
Zone ya kabiri igizwe n’ibihugu umunani ari byo Cape Verde, Gambia, Guinea Bissau, Guinea, Mali, Mauritania, Senegal na Sierra Leone.
Imikino yayo izabera muri Senegal.
Zone ya gatatu igizwe n’ibihugu umunani ari byo Benin (niyo izakira iyo mikino), Burkina Faso, Ivory Coast, Ghana, Liberia, Nigeria, Niger na Togo.
Zone ya kane igizwe n’ibihugu umunani ari byo Central Africa, Congo Brazzaville, Chad, Cameroon( niyo izayakira), Congo, Gabon, Equatorial Guinea n’ibirwa bya Sao Tome and Principe.
Zone ya gatanu( niyo irimo ibihugu byinshi kuko ari 12) igizwe na Djibouti, Misiri, Eritrea, Ethiopia, Kenya, u Rwanda, Somalia, Sudani y’Epfo, Sudan, Tanzania, Uganda ( niyo izayakira) n’u Burundi.
Zone ya gatandatu igizwe na Angola, Botswana, Lesotho, Malawi, Mozambique (niyo izayakira), Namibia, Afurika y’Epfo, Eswatini, Zambia na Zimbabwe mu gihe Zone ya karindwi igizwe n’ibihugu bine ari byo Comoros (izayakira), Madagascar, Mauritius n’ibirwa bya Seychelles.
