Perezida Donald Trump yasinyanye n’Abakuru b’ibihugu by’Abarabu amasezerano yo guhuriza hamwe imbaraga hakubakwa Gaza nshya y’amahoro kandi iteye imbere.
Ayo masezerano yasinyiwe i Sharm el Sheikh mu Misiri mu nama Trump yitabiriye avuye muri Israel kwitabira gutaha kw’abaturage ba Israel Hamas yari yaratwaye bunyago.
Trump yabwiye abayobozi bari mu nama ya Sharm el Sheikh ko igihe cy’umucyo n’amahoro kigiye gutangaza mu Burasirazuba bwo Hagati.
Ati: “Umunsi mushya kandi mwiza wageze. Ubu igihe cyo kubaka ibishya cyageze.”
Yavuze ko ibihugu byagize uruhare mu gutuma amahoro aboneka hagati ya Hamas na Israel ari ibyo gushimirwa.
Iby’ingenzi muri byo ni Misiri na Qatar.
Mu Misiri wabonaga ko Trump yishimiye abo bari kumwe barimo Perezida Abdul Fattah al-Sisi wa Misiri n’abandi bayobozi 20 bo muri Aziya no mu Burayi.
Nyuma y’ibyo biganiro Perezida wa Misiri yahaye Trump umudali w’ubucuti bw’indashyikirwa Amerika igaragariza igihugu cye witwa the Order of the Nile.
Sissi nawe yavuze ko ibikubiye mu masezerano yasinywe byabaye uburyo bushya bwo kwandika amateka nyuma y’igihe kibabaje cy’amateka yo mu Burasirazuba bwo Hagati.
Umwe mu bayobozi bifotoranyije na Trump ni Mahmoud Abbas uyobora Palestine, uyu Amerika ikaba iherutse kumubuza kwitabira Inama y’Inteko rusange y’Umuryango w’Abibumbye ibihugu byinshi by’isi byatangarijemo ko byemeye ko Palestine iba igihugu kigenga byuzuye.
Hagati aho, Trump avuga ko ibyiciro bindi by’amasezerano y’amahoro hagati ya Israel na Hamas nabyo byatangiye gushyirwa mu bikorwa uko byateguwe.
Trump ari gukora ibintu bamwe bavuga ko bizatuma isi ihinduka mu miterere yayo.
Muri Manda ye ya mbere, yatumye Israel isinyana n’ibihugu birindwi by’Abarabu amasezerano yo kubanirana neza, agize ikitwa Abraham Accords.
Perezida wa Amerika kandi yatangaje ko umuhati we uzakurikiraho uzajya ku ntambara y’Uburusiya na Ukraine, akazabikora amaze kubona ko ibya Hamas na Israel byafashe umurongo uhamye.
Mu ijambo yavuze ariya masezerano yo mu Misiri akimara gusinywa, yagize ati: “ Ibi nari maze iminsi mbitegereje, numvise kandi ko Uburasirazuba bwo Hagati ari mu muriro, ubu rero ibintu bigiye kuba byiza. Aya niyo masezerano akomeye cyane abantu bazahora bibuka ko yatumye ibibazo byari ingorabahizi bikemuka.”
Abayobozi bari bari mu Misiri barimo Perezida Sissi wabakiriye, Umuyobozi w’ikirenga wa Qatar Emir Sheikh Tamim bin Hamad Al Thani na Perezida wa Turikiya Recep Tayyip Erdogan.
Uburayi bwari buhagarariwe na Minisitiri w’Intebe w’Ubwongereza Keir Starmer, uw’Ubudage bita Chancellor Friedrich Merz na Minisitiri w’Intebe w’Ubutaliyani Giorgia Meloni.
Muri rusange, abayobozi 20 bakomeye mu bihugu byabo nibo bari bitabiriye uyu muhango benshi bemeza ko uzandikwa mu mateka.
