Nyuma y’imyaka ibiri ubwami bwa Arabie Saoudite bubujije abantu gusura ahantu hatagatifu i Mecca, ubu bwabakomoreye buvuga ko bwiteze ko abazasura aha hantu muri uyu mwaka bazagera kuri miliyoni imwe.
Ni umubare munini ugereranyije n’ibihe isi irimo bya COVID-19 .
Icyakora, ubwami bwa Arabie Saoudite bwavuze ko abantu bemerewe gusura i Mecca bagomba kuba batarengeje imyaka 65 y’amavuko kandi bakaba barikingije COVID-19 mu buryo bwuzuye.
Ibi byatangajwe na Minisitiri ushinzwe ibikorwa byo gusura i Mecca, ibikorwa bita Hajj na Umrah, bikaba byasohowe n’Ikigo cy’itangazamakuru cya Arabie Saoudite kitwa SPA .
Abanyamahanga nabo bemerewe kuzasura ahantu hatagatifu i Mecca ariko bakazerekana ko bisuzumishije COVID-19 bakoresheje uburyo bwa PCR .
Mu mwaka ushize, ubutegetsi bwa Arabie Saoudite bwavuze ko abantu 60,000 bonyine ari bo bemerewe gusura hariya hantu.
Mbere y’uko COVID-19 yaduka, abantu bagera kuri miliyoni 2.5 nibo basuraga i Mecca.
Ikindi ni uko muri kiriya gihe, abantu basuraga i Mecca n’i Medina binjirizaga Arabie Saoudite amafaranga agera kuri Miliyari 12 $ ku mwaka nk’uko Reuters ibitangaza.
