Ikigo cy’imari cya BK Capital cyahembewe kuba Umuhuza mwiza w’Isoko ry’Imari n’Imigabane mu Rwanda mu mwaka wa 2024.
Iki kigo gishinzwe kugurisha imigabane kikaba cyahembewe uruhare rwacyo mu buhuza ku isoko ry’imari n’imigabane, guhanga udushya bikajyana no guteza imbere urwego rw’imari mu Rwanda.
Igihembo iki kigo cyahawe kitwa Best Securities House in Rwanda gitangwa na EuroMoney.
Byagaragaye ko BK Capital igira uruhare runini mu bikorwa byayo, bigatanga ishusho y’uburyo ubuyobozi bwayo muri uru rwego rw’ubuhuza mu by’imari n’imigabane bwitwara neza.
Mu mpera z’umwaka wa 2023, iki kigo cyafatanyije na Banki y’iterambere y’u Rwanda (BRD), batangiza ku isoko impapuro mpeshwamwenda mu buryo burambye cyangwa se by’igihe kirekire mu Cyongereza bita Sustainability-linked Bonds, SLB).
Zari zigize igice kinini kingana na miliyari Frw 150 (miliyoni $ 113) muri gahunda y’ibijyanye n’imari mu buryo burambye.
Niryo shoramari bivugwa ko ryabaye rinini ryanditswe mu rwego rw’imari n’migabane mu Rwanda.
Igice cya mbere cy’izo mpapuro zifite agaciro ka miliyari Frw 30, (miliyoni $ 23) zitabiriwe ku kigero kingana 103%, naho icyiciro cya kabiri giherutse gutangazwa kingana na miliyari Frw 33.5 (miliyoni $ 25) zaguzwe ku mpuzandengo ya 130% bishimangira icyizere gikomeye isoko rifitiwe.
Uruhare rw’iyi gahunda y’impapuro mpeshwamwenda mu buryo burambye, rwarushijeho kwiyongera no gutuma Banki y’Isi irushaho kongera inguzanyo iha Guverinoma y’u Rwanda.
By’umwihariko BK Capital niyo yayoboye gahunda ya mbere y’impapuro mpeshwamwenda zigamije kurengera ibidukikije zizwi nka ‘Green bonds’, iyo gahunda iri mu zikunzwe muri iki gihe.
Ikigo Prime Energy, nicyo cyazishyize bwa mbere ku isoko ry’u Rwanda, ziza zifite agaciro ka miliyari Frw 9,5 (miliyoni $ 7).
Mu myaka ibiri ishize, BK Capital yagize uruhare runini mu gufasha ibigo byigenga no mu bijyanye n’imitungo itimukanwa.
Hakusanyijwe agera kuri miliyari Frw 90 (miliyoni $ 72) binyuze mu gufasha abikorera ku giti cyabo ariko no muri gahunda yo kubyaza umusaruro amahirwe mashya.
Mu rwego rwo korohereza abantu kubona igishoro, BK Capital yashyigikiye iterambere ry’ubukungu bw’u Rwanda binyuze no guhanga udushya mu ikoranabuhanga rikoresha imari na serivisi.
BK Capital iteza imbere abakiliya ikabafasha kugira ubunararibonye binyuze muri porogaramu (Software) nshya ifasha mu buhuza ikoroshya uburyo bwo kugura no kugurisha imigabane.
Bigira uruhare mu gutanga amakuru, bikagabanya amakosa yaterwaga n’uburyo byakorwagamo butari ikoranabuhanga.
Iki kigo cyagerageje korohereza abashoramari hakoreshejwe ikoranabuhanga (Digital onboarding tool for retail investors) mu kugura impapuro mvunjwafaranga, no kugabanya ikoreshwa ry’impapuro no kurushaho gufata neza abakiliya.
BK Capital yiyemeje kunoza imiyoborere no koroshya amategeko agenga imishinga mito n’iciriritse kugira ngo igere ku isoko ry’imari n’imigabane.
