Jean Claude Ndemeye aravugwaho guhungira muri Tanzania ahunganye Miliyari Fbu 1(Franc Burundais) ni ukuvuga Miliyoni Frw 490, akaba amafaranga yabonye mu buryo butazwi n’inzego za Leta.

Yacitse ubutabera nyuma yo kumenya ko hari amakuru y’uko ari gushakishwa ngo afungwe.

Yari asanzwe ari umushinjacyaha wo ku rwego rw’igihugu mu Burundi ushinzwe Komini za Kirundo na Busoni mu Ntara ya Butanyerera.

Ndemeye yamenye amakuru ko inzego zasanze kuri Konti ye hariho ayo mafaranga kandi hatazwi aho yayakuye kuko umushahara we wari usanzwe uzwi.

Mu mpera z’Ukwakira, 2025 nibwo yacikiye muri Tanzania.

Abatangabuhamya babwiye SOS Media Burundi ko uwo mushinjacyaha yahagurutse i Busoni ajya mu gace ka Bwambarangwe, mbere yo kwambuka umupaka wa Kobero mu Ntara ya Muyinga, agahungira muri Tanzania.

Mbere y’uko ahunga, Jean Claude Ndemeye yari asanzwe aregwa n’abaturage ko akoresha nabi ububasha ahabwa n’itegeko.

Ndetse muri Komini ya Kirundo hari imiryango imushinja gufunga abantu mu buryo bunyuranyije n’amategeko no kubaka amafaranga kugira ngo bafungurwe ari we ubigizemo uruhare.

Ikindi ni uko yari afite itsinda ry’abamukoreraga, bashinzwe kuganira n’imiryango y’abafunzwe ngo barekurwe nyuma yo kwishyura ingano runaka y’amafaranga.

Umwe mu baturage yagize ati: “Nufite icyaha yakurwaga mu buroko yishyuye.”

Nubwo yahunze abaturage babwiye ko bishimiye gukurikiranwa mu butabera nubwo yahunze.

Basaba ko nafatwa yazabazwa ibyo yabakoreye kandi bagahabwa indishyi.