Mu rwego gufasha Abanyarwanda bose kureba imikino ya CAN iri kubera muri Cameroon badahenzwe, Ikigo gicuruza serivisi z’amashusho ku rwego rw’isi CANAL+ Rwanda cyashyizeho poromosiyo yo kugabanya ibiciro by’ibikoresho ku FRW 5 000 na ‘installation’ ku FRW 5 000 kugira ngo abifuza kureba iki gikombe cy’Afurika bakirebe badahenzwe kandi mu mashusho ayunguruye.
Umuyobozi wa Canal + Rwanda Sophie Tchatchoua ukomoka muri Cameron aho iki gikombe kiri gukinirwa ndetse n’ikipe y’igihugu cye ikaba iherutse kwitwara neza igatsinda Burkina Faso, yavuze ko intego ya Canal + Rwanda ari ugushimisha Abanyarwanda n’ubwo ikipe yabo y’igihugu ititabiriye ariya marushanwa.
Yagize ati: “N’ubwo Amavubi atari gukina muri iki gikombe ngo tubone abafana benshi, ariko abakunda umupira bose bazi ko iri rushwanwa rikomeye cyane muri Afurika. Niyo mpamnvu twifuza ko buri Munyarwanda wese yarirebera kuri CANAL+ adahenzwe.”
Tchatchoua avuga ko mu rwego rwo kurushaho guha abakiliya ba CANAL+ Rwanda ibyishimo, umufatabuguzi wese uri kugura irindi fatabuguzi muri uku kwezi(Mutarama) ahabwa iminsi 15 areba amashene yose ya CANAL+.
Ubusanzwe abantu bari bamenyereye ko kureba imikino ya kiriya gikombe bihenze kuko byasabaga kwishyura byibura Frw 20 000, ariko mu rwego rwo gufasha abakiliya ba CANAL+ Rwanda, ubuyobozi bw’iki kigo bwatangaje ko imikino y’iri rushanwa bazayireba ku bwasisi bwa Frw 5000 kuri abonema y’ikaze kuri shene ya CANAL+ Sport 1.
Amasaha hafi 150 y’imipira inyuraho imbonankubone(live), n’ibiganiro bizajya bitangwa n’abanyamakuru bakomeye ba siporo nka Charles Mbuya, Malick Traoré, ndetse n’abandi, bikaba ari bimwe mu itandukaniro uzarebera umupira kuri CANAL+ azajya arusha abandi batawuharebeye.
Ese ubundi ni uwuhe mwihariko wa CAN 2022?
Ni igikombe giheruka kuba mu mwaka wa 2019 ubwo cyegukanwaga na Algeria, kikazakinwa n’amakipe 24 agabanyije mu matsinda atandatu, rimwe rigizwe n’amakipe ane.
Amakipe abiri ya mbere mu itsinda azahita abona itike yo gukina icyiciro gikurikira cy’irushanwa.
Azakinira ku bibuga bya Olembe Stadium na Stade Ahmadou Ahidjo mu murwa mukuru Yaounde; Japoma Stadium i Douala, Limbe Stadium i Limbe, Kouekong Stadium i Bafoussam na Roumde Adjia Stadium i Garoua.
Impuzamashyirahamwe y’Umupira w’Amaguru muri Afurika (CAF) yamenyesheje amakipe agiye gukina igikombe cya Afurika ko nubwo ikipe izaba isigaranye abakinnyi 11 gusa abandi bose banduye Covid-19, bagomba kwitabira umukino.
Ni amabwiriza agomba kubahirizwa nubwo muri abo bakinnyi 11 nta n’umwe waba urimo usanzwe akina mu izamu.
Igihugu kizasiba umukino kizajya giterwa mpaga y’ibitego 2-0.
Aya mabwiriza yatangajwe nyuma y’uko ibihugu byinshi bikomeje guhura n’ubwandu bwa COVID-19 mu bakinnyi n’abatoza.
CAF yavuze ko mu gihe cyihariye, komite ishinzwe gutegura irushanwa izajya ifata icyemezo gikwiye.
Ku wa Gatanu nibwo Ikipe y’igihugu ya Misiri yakereje urugendo rwayo mu irushanwa, ndetse inahagarika imyitozo nyuma y’uko mu bakinnyi hari habonetsemo uburwayi.
Iyi kipe izwi nka ‘The Pharaohs’ yanegukanye iri rushanwa inshuro zirindwi, yerekeje muri Cameroon kuri uyu wa Gatandatu.
Ku rundi ruhande, rutahizamu Pierre-Emerick Aubameyang ni umwe mu bakinnyi babiri ba Gabon basanzwemo COVID-19 ku wa Kane.
Uretse kuri ibyo bihugu, Guinea iheruka gusiga mu Rwanda myugariro Mikael Dyrestam, umukinnyi wo hagati Morlaye Sylla na rutahizamu Seydouba Soumah, ubwo bari mumyiteguro mbere yo kwerekeza muri Cameroon.
Cape Verde na Gambia nabo bibasiwe n’ubwandu bushya mu makipe y’ibihugu, mu gihe Tunisia yatangaje ko hari abakinnyi banduye mbere yo kujya mu mwiherero ubanziriza iri rishanwa.
Kuri iki cyumweru rirafungurwa n’umukino uhuza Cameroon na Burkina Faso saa 18h00 kuri Olembe Stadium, ari nayo izakira umukino wa nyuma ku wa 7 Gashyantare 2022.
Ku nshuro ya mbere iri rushanwa rizifashisha ikoranabuhanga ry’amashusho (VAR) mu gukemura impaka ku bikorwa bimwe na bimwe biba bishidikanywaho.
Uko amatsinda y’irushanwa ateye:
Itsinda A: Cameroon (yakiriye irushanwa), Burkina Faso, Cape Verde, Ethiopia
Itsinda B:Guinea, Malawi, Senegal, Zimbabwe
Itsinda C: Comoros, Gabon, Ghana, Morocco
Itsinda D: Misiri, Guinea Bissau, Nigeria, Sudan
Itsinda E:Algeria, Equatorial Guinea, Ivory Coast, Sierra Leone
Itsinda F: Gambia, Mali, Mauritania, Tunisia.
