Imibare y’uko abaturage ba DRC baherutse gutora, yatangiye kujya ku mugaragaro.
Ababa mu mahanga batoye ku bwinshi Félix Tshisekedi ngo akomeze kuyobora Repubulika Iharanira Demokarasi ya Congo, RDC.
Nyuma y’umunsi umwe amatora y’Umukuru w’Igihugu arangiye,
Kuri uyu wa Gatanu mu ijoro nibwo bimwe mu byavuye mu matora byatangiye kumenyekana.
Komisiyo y’amatora( CENI) yatangaje ayo manota ihereye ku batoreye mu bihugu bitanu.
Abakozi bayo bari gukoresha ikoranabuhanga ngo babarure kandi batangaze ibyavuye mu majwi yabaruwe.
Amajwi ava kuri site zitandukanye akerekanwa kuri écran ninini zamanitswe kuri site nkuru ya Bosolo mu Murwa mukuru, Kinshasa.
Ayerekanywe kugeza ubwo twandikaga iyi nkuru yerekana ko mu Bufaransa, Tshisekedi yagize amajwi 85,58%, agira 78,88% muri Leta Zunze Ubumwe za Amerika agira 72,33% muri Canada, 75,94% mu Bubiligi na 81,27% muri Afurika y’Epfo.
Iyi Komisiyo yari yatanze isezerano ko nta gihindutse, gutangaza amajwi biri burangirane n’impera z’iki cyumweru.
Hagati aho abandi bahanganye na Tshisekedi ari bo Martin Fayulu, Denis Mukwege na Moïse Katumbi bagaragaje impungenge z’uko ibizava mu matora bizaba bidaciye mu mujyo.
Baherutse ngo gusaba ko yasubirwamo.
Ku rundi runde, Ambasaderi wa Amerika i Kinshasa yasabye CENI gukora inshingano zayo neza, nta kubogama.
CENI nayo yijeje abakandida, Abanye-Congo muri rusange n’abafatanyabikorwa ko izakomeza gukora inshingano zayo neza.
