Taarifa ifite amakuru ko hari abantu bitwaje intwaro bagaragaye muri Perezidansi ya Repubulika ya Demukarasi ya Congo bafiten’ibendera ry’iki gihugu. Bikekwa ko bashakaga guhirika ubutegetsi n’ubwo Guverinoma itaragira icyo ibitangazaho.

Hagati aho Radio Okapi itangaza ko hari igitero cyagabwe ku rugo rwa Vital Kamerhe usanzwe ari Visi Minisitiri w’Intebe, Minisitiri w’ubukungu n’umukandida wo kuzayobora Inteko Ishinga amategeko y’iki gihugu.

Urugo rwa Kamerhe ruherereye ahitwa Gombe, rukaba rwagabweho igitero mu rukerera rwo kuri iki Cyumweru saa 4h30.

Umuvugizi wa Kamerhe witwa Michel Moto niwe wabitangaje.

Uyu asanzwe ari  Umudepite w’ishyaka rya Kamerhe ryitwa Union Nationale Congolaise, UNC.

Avuga ko hari abapolisi babiri mu bamurinda bahasize ubuzima ndetse n’umwe mu bagabye icyo gitero nawe ntiyasigaye.

Ati: “ Vital Kamerhe n’umuryango we bo bameze neza kandi umutekano wabo wongerewe imbaraga”.

Ambasaderi w’Ubuyapani muri DRC witwa Hidetoshi Ogawa nawe yameje iyi ngingo asaba abaturage b’igihugu cye baba muri DRC kwigengesera, bakirinda kwishyira mu kaga.

Ku byerekeye Coup d’etat, Radio Okapi ivuga ko nyuma yo gutera kwa Kamerhe, mu Biro by’Umukuru w’igihugu naho hagaragaye abantu bari bafite imbunda n’ibendera rya Zaïre( ni ko Repubulika ya Demukarasi ya Congo yitwaga mbere) bavuga ko bashaka ko ibintu bihinduka mu nyungu za Repubulika.

Ku mbuga nkoranyambaga, hariho amashusho y’abo bantu bahagaze imbere muri Perezidansi ya Repubulika ya Demukarasi ya Congo.

Baje kuhavanwa, ariko umutekano urakazwa kugira ngo ibintu bisubire mu buryo.

Biteganyijwe ko hari bube inama idasanzwe y’umutekano ikaza gukurikirwa n’itangazo rya Guverinoma rivuga kuri icyo kintu.

Amakuru ataremezwa n’urwego urwo ari rwo rwose avuga ko uwateguye igitero kivugwa ko cyari icyo guhirika Tshisekedi yari asanzwe aba muri Amerika.