Visi Perezida wa  Guinée Equatoriale  Teodoro Obiang Nguema Mangue yanditse ku rubuga X ko bagiye guhagarika abayobozi bose bagaragaye bakorera imibonano mpuzabitsina mu Biro bya Minisitiri.

Hari amashusho menshi y’umwe mu bategetsi bakuru ari gukora imibonano mpuzabitsina mu biro n’abagore ba bamwe mu bakomeye mu butegetsi bwa Guinée Equatoriale.

Teodoro Obiang Nguema Mangue mu butumwa yacishije kuri X yagize ati:  “Uyu munsi, turahagarika abategetsi bose bakoreye imibonano mpuzabitsina mu biro bya minisiteri”.

Avuga ko ibyo bakoze bigize kurenga ku mabwiriza ngengamyitwarire iranga umuyobozi.

Kugira ngo ibyo bimenyekane, byahereye ku mashusho abashinzwe iperereza basanze muri mudasobwa za Baltasar Engonga wari usanzwe uyobora Urwego rw’igihugu rushinzwe iperereza mu by’ubukungu n’imari rwitwa National Financial Investigation Agency.

Bikirangiza kujya ku karubanda, Visi Perezida yahise yihaniza abashinzwe itumanaho na murandasi guhagarika ikwirakwira ry’ayo mashusho mu rwego rwo kwirinda ko igihugu gikomeza kwandagara.

Mbere y’uko icyo cyemezo gifatwa, ayo mashusho yari yageze ku mbuga nkorambaga zikomeye nka Facebook, Instagram, TikTok na X yahoze yitwa Twitter.

Inzego z’iperereza za kiriya gihugu cyo mu Burengerazuba bw’Afurika zabanje gufata Baltasar Engengo zimukurikiranyeho ibindi byaha ariko, mu gushakisha ibindi bimenyetso, ziza kugwa kuri ariya mashusho.

Ntiharamenyekana uwabishyize ku karubanda.

Umushinjacyaha mukuru w’iki gihugu, Anatolio Nzang Nguema, yavuze ko nubwo ayo mashusho bigaragara ko yafashwe ku bwumvikane bw’abakoraga imibonano, Engonga ashobora gukurikiranwa ku “byaha ku buzima bw’abantu”.

Byazarushaho gukomera igihe basanga hari abanduriye muri ubwo busambanyi.

Engonga ni umuhungu wa Baltasar Engonga Edjo, ukuriye komisiyo y’Umuryango w’ubukungu n’ifaranga ry’ibihugu byo muri Afurika yo hagati, uzwi nka CEMAC – Edjo na we akaba mwishywa wa Perezida Teodoro Obiang Nguema.

Ikwirakwira ry’aya mashusho ryateye uburakari  bamwe mu baturage b’iki gihugu.