Mu Bwongereza hadutse ubundi bwoko bwa COVID-19 bwise Nu. Bwatumye umubare w’abanduye n’abahitanwa na kiriya cyorezo wiyongera ndetse na Minisiteri y’ubuzima itegeka abaturage guhabwa urundi rukingo rwo kubongerera imbaraga.
Ikibazo gihari muri iki gihe ni ukureba niba abaturage bazongera ‘gutegekwa’ kongera kwambara agapfukamunwa.
Umunyamabanga wa Leta mu Bwongereza ushinzwe ubuzima witwa Sajid Javid yavuze ko abaturage bagombye guhabwa urundi rukingo kugira ngo rubongerere ubudahangarwa, bazashobore guhangana n’ubwandu bushya bwahadutse.
Abahanga babwise NU , ubu bukaba ari ubwandu buje busanga ubundi bwitwa MU bwari bumaze iminsi buvugwa hirya no hino ku isi.
Sajid Javid yabwiye abanyamakuru ko u Bwongereza bufite ikibazo cy’ubwiyongere bw’abandura k’uburyo muri iki gihe handura abantu bagera ku 10 000 ku munsi.
Avuga ko abakora inkingo bafite ikibazo cyo gukora uko bashoboye ngo basohore inkingo zo guha abaturage kugira ngo ubwandu bushya buri kuvugwa muri iki gihe buzasange barakingiwe.
Mu Bwongereza hari undi mugambi wo guhangana na COVID-19 uri gutekerezwa wiswe Plan C.
Ikibazo ni uko ubwandu bushya buri kuhavugwa, buzamuka mu muvuduko wo hejuru k’uburyo buri kwanduza abantu benshi ugereranyije n’uko byahoze mu zabubanjirije.
Muri kiriya gihugu haherutse kwandura abantu 50,000 mu munsi umwe.
Hari n’abavuga ko muri kiriya gihugu hashobora gushyirwaho indi Guma mu Rugo cyangwa izindi ngamba zikomeye zo gukumira ubwandu bwa kiriya cyorezo.
Mu minsi ishize Leta y’u Bwongereza yoroheje ingamba yari yarafashe ngo ikumire ko abaturage b’u Bwongereza bandura COVID-19 cyane.
Yakuyeho itegeko ryo kwambara agapfukamunwa no guhana intera.
Utubyiniro twarafunguwe ndetse n’ahandi hahurira abantu benshi harafungurwa.
Hamaze kwanduka amoko 13 ya COVID-19…
Ubwandu bwa kiriya cyorezo bumaze kwanduka ku isi:
– Alpha( mu Bwongereza),
-Beta( muri Afurika y’Epfo),
-Gamma( muri Brazil),
-Delta( mu Buhinde),
-Epsilon( muri Amerika),
-Zeta( muri Brazil),
-Eta( muri Nigeria),
-Theta( muri Philippines),
-Iota( muri Amerika),
-Kappa( mu Buhinde),
-Lambda( muri Thailand),
-Mu ( muri Colombia)
na Nu itaramenyekana aho yaturutse mu by’ukuri.
Aya mazina yose yatanzwe hakurikijwe inyajwi zigize Ikigereki.
