Uruganda Janssen Pharmaceutica NV rwemeje ko rugiye guha Umryango wa Afurika Yunze Ubumwe (AU) inkingo miliyoni 400 za Johnson & Johnson, zizifashishwa mu gukingira icyorezo cya COVID-19. Ni inkingo zizatangira gutangwa mu gihembwe cya gatatu cy’uyu mwaka wa 2021.
Iyi gahunda igiye gukorwa nyuma y’iko Ikigo Janssen Pharmaceutica NV gikora urwo rukingo cyemeranyije n’ikigo African Vaccine Acquisition Trust (AVAT) gutanga inkingo miliyoni 220 z’urwo rukingo ruterwa inshuro imwe.
Muri ayo masezerano, AVAT ishobora gutumiza izindi nkingo zisaga miliyoni 180 mu mwaka wa 2022.
Ni amasezerano yemeranyijweho nyuma y’ibiganiro bimaze iminsi na AU, kuva ubwo muri Mutarama uyu muryango watangazaga ko ugiye kugura inkingo miliyoni 270 za J&J, AstraZeneca na Pfizer-BioNTech.
AVAT kuri uyu wa Mbere yatangaje ko ibihugu byinshi muri 55 bigize AU byagaragaje ko byiteguye gukoresha urukingo rwa J&J.
Ni inkingo zizafasha mu gukingira abaturagemiliyoni 750 cyangwa 60% by’abatuye uyu mugabane, mu rwego rwo kwirinda icyorezo kimaze guhitana abanyafurika 121.000 naho abarenga miliyoni 4.18 bamaze kwandura.
Umuyobozi w’ikigo nyafurika gishinzwe kurwanya ibyorezo, Africa CDC, Dr John Nkengasong, yagize ati “Dukeneye gukingira nibura 60% by’abaturage bacu kugira ngo tubashe guhangana n’iyo virus ku mugabane wacu. Amasezerano na J&J aradufasha gutera intambwe tugana kuri iyo ntego.”
Inkingo nyinshi zizakorwa n’ikigo Aspen Pharma muri Afurika y’Epfo.
Nkengasong ntabwo yatangaje amafaranga urukingo rumwe rzajya rugurwa, ariko Reuters yatangaje ko amasezerano yabonye muri Mutarama yagaragazaga ko ibihugu bya Afurika bizajya bitanga $10 ku rukingo rumwe.
Binyuze muri gahunda ya AU, African Export-Import Bank (Afreximbank) iheruka kwemeza miliyari $2 zishobora kwifashishwa n’ibihugu mu kugura inkingo.
Muri uku kwezi uru rukingo rwa J&J rwemejwe mu bihugu byo mu Burayi, Leta Zunze Ubumwe za Amerika, Canada na Bahrain.
