Ishami rya IBUKA muri Huye ritangaza ko mu mezi make ashize hari imibiri 300 bikekwa ko ari iy’Abatutsi bazize Jenoside yakorewe Abatutsi mu mwaka wa 1994 yabonetse mu Kagari ka Matyazo, Umurenge wa Ngoma.
Guhera muri Kamena, 2025 kugeza ubu mu Midugudu ya Kamucuzi, Rurenga na Kamatyazo hamaze kuboneka imibiri 301, imwe ikaba yari yarubakiweho inzu indi bayitaburura mu mirima yari isanzwe ihingwa.
Yabonetse mu bihe n’ahantu hatandukanye guhera mu mpeshyi y’uyu mwaka muri Kanama, imwe iboneka mu isambu ya Faustin Munyempamo bita Gérard, aha hakaba harabonetse imibiri 46.
Mu ntangiriro za Nzeri, indi yabonetse mu isambu ya Gasarasi habonetse imibiri 92 naho uku kwezi k’Ukwakira kukaba kugiye kurangira habonetse imibiri 180.
Abasomyi bibuke ko atari ubwa mbere muri Huye ahabonetse imibiri myinshi y’abazize Jenoside yakorewe Abatutsi kuko mu myaka ibiri ishize kugeza ubu hamaze kuboneka imibiri yose hamwe 3,500.
Mu Murenge wa Ngoma mu tugari twa Ngoma na Matyazo hamaze kuboneka imibiri isaga 3500, kuko mu 2024 hashyinguwe abasaga 2000, muwa 2025 muri Gicurasi hashyingurwa abasaga 1200, ubu hamaze kuboneka isaga300 kandi n’imibare ishobora kwiyongera.
Hamwe muho ivugwa aha iherutse kuboneka higeze no kuboneka indi igera ku 2000 yabonetse mu mwaka wa 2023.
Icyo IBUKA ivuga k’ukuba iyo mibiri yaratinze kuboneka…
Perezida wa IBUKA muri Huye Siboyintore Théodate yabwiye bagenzi bacu ba IGIHE ko impamvu nyamukuru zivugwa ko zaba zaratindije kuboneka kw’imibiri myinshi nyuma y’igihe kirekire, ari uko abahakoze Jenoside barimo abimukira bari abapagasi bakaba barisubiriye iwabo.
Indi ni uko Matyazo itari ituwe nk’uko bimeze ubu no kuba abahari ubu ari abimukira bahaguze.
Ati: “Abatuye mu Matyazo ubu abenshi ni abimukira, noneho abari bahatuye mbere ya Jenoside bari ba kavukire abenshi barahunze, abandi barapfa. Abahatuye ubu ni abagiye bahagura ibibanza nyuma, abaguze inzu, ufite aho ahinga mu gikari ntagere kure ikuzimu kuko akenshi baba bahinga imboga.’’
Irindi sesengura ryakozwe, nk’uko abivuga, ryerekana ko Abatutsi baguye mu Matyazo barimo n’abaturutse kure muri Nyaruguru y’ubu ababashije guhunga bava i Karama, abavuye ahandi za Gikongoro, bikiyongeraho imiterere y’aka gace karimo imihanda myinshi yabagamo bariyeri nyinshi mu gihe cya Jenoside.
Kuri iyo mihanda yari ho bariyeri haciwe benshi ababishe bakabata aho.
Kugira ngo ahenshi muho abo bantu baguye hamenyekane byatangajwe n’abakoze Jenoside barekuwe barangije igihano cyabo.
Perezida wa IBUKA ati: “Ubu tumaze kubona indi mibiri myinshi. Aho byahereye ni kwa Hishamunda, byarakomeje bigera kwa Supa, ubu niho turi, tuhamenyeshwa n’abantu baza basanga turi gukura imibiri ahantu bagahita badutungira agakoti n’ahandi twahagera koko tukayibona.”
Avuga kandi ko byaturutse no mu buhamya buherutse gutangwa mu Kwibuka ku nshuro ya 31 bwatangiye kuri ADEPR Matyazo, aho abantu bahamije ko ibice byinshi bya Matyazo byajugunywamo abantu.
Siboyintore yavuze ko bifuza ko abafite amakuru y’aho imibiri yaba iri hose bahavuga kugira ngo abishwe bashyingurwe mu cyubahiro.
