Alliance Isimbi wamamaye ku izina rya Alliah Cool muri cinema nyarwanda yahawe igihembo cy’uko akina neza kandi akaba yaragize uruhare mu kuzamura imibereho y’abatishoboye.
Igihembo yaherewe muri Nigeria kitwa ‘Great Achievers Award’.
Ikindi yashimiwe ni uko ari muri ba Ambasaderi bakiri ba bato b’imiryango ishamikiye kuri UN bagize uruhare mu kuzamura imibereho y’abagore kugira ngo bazabeho neza ejo hazaza.
Asanzwe afite ikigo yise Ishusho Arts Center, kikaba ikigo kigisha urubyiruko gukina filimi no kuba abantu bahanga udushya mu ruganda rw’imyidagaduro.
Nyuma yo guhabwa kiriya gihembo, Alliance Isimbi yishimye, ashima abamutoye.
Yabwiye abari bamuteze amatwi ko kiriya gihembo kiri no mu rwego rwo gushima umuhati w’Abanyarwanda[kazi] bakora uko bashoboye ngo bateze imbere igihugu cyabo binyuze mu kuzamura urwego rwa cinema ndetse no mu bundi buryo.
Yunzemo ko kuba igihembo yahawe cyatangiwe muri Nigeria, igihugu gifite uruganda rwa cinema rwa mbere rukomeye muri Afurika ari ikimenyetso cy’uko ibyo akora bihabwa agaciro cyane.
