Mu gice cya gatatu cy’ukwezi kwa Gashyantare 2026 (kuva taliki ya 21 kugeza taliki ya 28), mu Rwanda hateganyijwe imvura iri hagati ya milimetero 40 na 150, ikaba iri hejuru y’ikigero cy’impuzandengo y’isanzwe igwa muri iki gice.
Ni ibitangazwa na Meteo Rwanda.
Iki kigo cy’igihugu gishinzwe ubumenyi bw’ikirere kivuga ko ubusanzwe impuzandengo y’imvura isanzwe igwa iri hagati ya milimetero 10 na 80.
Iminsi izagwamo imvura izaba iri hagati y’iminsi ine (4) n’itandatu (6) bitewe n’imiterere ya buri hantu.
Iyo mvura iteganyijwe izaturuka ku isangano ry’imiyaga iva mu gice cy’amajyepfo y’Isi rizamuka rigana mu karere u Rwanda ruherereyemo no ku bwiyongere bw’ubuhehere bw’umwuka buturuka ahanini ku miyaga iva mu burengerazuba bw’Inyanja y’Ubuhinde yerekeza mu Karere u Rwanda ruherereyemo.
Ubushyuhe bwo hejuru buteganyijwe muri icyo gihe cyose buri hagati ya dogere Selisiyusi 21 na 30, naho ubushyuhe bwo hasi buteganyijwe buri hagati ya dogere Selisiyusi 9 na 18.
Umuyaga uringaniye ushyira kuba mwinshi ufite umuvuduko uri hagati ya metero 4 na 12 ku isegonda, uteganyijwe mu bice bitandukanye by’Igihugu.
Nk’uko bisanzwe, Meteo Rwanda isaba inzego gukorana mu gukumira ko iyo mvura yazateza ibiza kandi abaturage nabo bagasabwa kwitwararika bakirinda ibyashyira ubuzima bwabo mu kaga.
Ubuyobozi bw’Umujyi wa Kigali buherutse gusaba abaturage kuzirika ibisenge by’inzu zabo, imiferege igasiburwa kandi bakirinda ibyateza akaga ako ari ko kose.
