Minisiteri y’Ubuzima yohereje inkingo zirenga ibihumbi 234 hirya no hino mu gihugu, zigiye guhabwa abaturage barengeje imyaka 50 mu turere 21.
Kuri uyu wa Kane nibwo Minisiteri y’Ubuzima yatangaje ko izo nkingo zamaze kugera mu turere zizaherwamo abaturage, guhera kuri uyu wa 10 Nzeri 2021.
Yanditse kuri Twitter iti “Uyu munsi doze zirenga 137,000 z’urukingo rwa AstraZeneca n’izindi 97,000 zo mu bwoko bwa Sinopharm zoherejwe mu turere 21 mu ntara zose z’igihugu. Zizahabwa abafite kuva ku myaka 50 kuzamura n’abafite indwara zidakira. Gukingira bizatangira ku wa 10, 09, 2021.”
Ni igikorwa kigiye kubera mu turere dutandukanye, mu gihe mu Mujyi wa Kigali hamaze iminsi hakingirwa abantu bose barengeje imyaka 18.
Kugeza kuri uyu wa Gatatu hari hamaze gukingirwa abaturarwanda miliyoni 1.6 bahawe urukingo rwa mbere, mu gihe abagera ku bihumbi 920 ari bo bahawe inkingo ebyiri ziteganywa.
U Rwanda ruheruka kwakira inkingo zo mu bwoko bwa Johnson & Johnson zo umuntu ahabwa rumwe gusa, bitandukanye n’izindi.
Guverinoma y’u Rwanda yatangaje ko yaguze izo nkingo 2,191,000 binyuze muri gahunda yo kugura no gukwirakwiza inkingo mu bihugu bya Afurika, izwi nka AVAT.
