Uwo muntu warashwe na robot yitwaga Dr Mohsen Fakhrizadeh akaba ari we wari ubwonko bwatekerezaga imishinga yo gukora ibisasu bya kirimbuzi ya Iran kandi akagira n’uruhare mu ikorwa ryabyo.
Uretse kuba yari umuhanga mu butabire, yari n’umusirikare mukuru ufite ipeti rya Brigadier General mu ngabo za Iran.
Yishwe na robot yari yarakozwe binyuze mu guteranya ibyuma bakuye ku mbunda abakozi ba Mossad bibye muri Iran, bakagenda batwara icyuma kimwe kimwe, nk’uko ku ikubitiro byatangajwe n’ikinyamakuru cyo mu Bwongereza kitwa Jewish Chronicle cyabyanditse.
Dr Gen Mohsen Fakhrizadeh yarashwe n’imbunda yari ihishe mu modoka imwitegeye ubwo yari aciye mu cyerekezo cyayo.
Yarashwe ageze muri Rond-point ahitwa Asbard. Yumvise amasasu asohoka asa n’ujya kwihisha hanyuma aba agiye ku mugaragaro hanyuma bamurasisha machin gun.
Inkuru y’iraswa ry’uriya mugabo yavuzwe bwa mbere mu mwaka wa 2020 ariko ntibabitindaho.
Raporo icukumbuye uherutse gutangazwa na The New York Times yemeje ko ibyo The Jewish Chronicle yanditse bwa mbere bifite ishingiro.
Ni mu nkuru yanditswe icukumbuwe n’abanditsi babiri barimo Ronen Bergman na Farnaz Fassihi yasohotse ku wa Gatandatu tariki 18, Nzeri, 2021.
Yarashwe tariki 27, Ugushyingo, 2020 ari kumwe n’umugore, arasirwa mu nkengero z’Umurwa mukuru wa Iran, Tehran.
Igitero cyamuhitanye cyamaze iminota itatu gusa.
Cyakoranywe ubuhanga k’uburyo kuva icyo gihe kugeza n’ubu nta bantu barafatwa bacyekwaho uruhare muri cyo.
Nyuma ya kiriya gitero, abayobozi bo muri Iran bahise batangira gushyira mu majwi abakozi b’ikigo cy’ubutasi bwo hanze cya Israel kitwa MOSSAD.
Uko robot yarashe uriya mugabo yakozwe nabyo ni ikindi…
Abahanga bo muri Mossad bafashe ibyuma by’imbunda zo muri Iran bagendaga biba babikusanyiriza mu modoka ya Pick up ifite ibara ry’ubururu bita Zamyad iri mu zikunzwe muri Iran.
Mu kizuru cy’iriya modoka( decoy) bahishemo imbunda yo mu bwoko bwa machine-gun yakorewe mu Bubiligi yitwa FN MAG 7.62-mm.
Hejuru yayo barenzaga shitingi iremereye kugira ngo irinde ko ikizuru cyatsikamira imbunda ndetse irinde ko ubushyuhe bwacyo buterwa n’izuba bwatuma imbunda ishyuha bitari ngombwa.
Ibi byose Mossad yabikoze mu gihe kirekire.
Ba banyamakuru ba The New York Times ari bo Bergman na Fassihi, banditse ko ibi byose byakozwe n’abakozi ba Mossad mbere cyane y’uko igitero kuri uriya mugabo kiba.
Ndetse ngo n’igihe cyo kurasa Dr Fakhrizadeh nta mukozi wa MOSSAD wari uhari ngo amurase, ahubwo babikoreye i Tel Aviv- Yafo ahari ikicaro cya MOSSAD.
Mu biro byabo, abakozi ba MOSSAD bakoresheje ikoranabuhanga rya robo( artificial intelligence) kugira ngo barase uriya mugabo kandi ntibamuhushe.
Bivugwa ko hari ibyabanje kwanga ariko nyuma biza gukunda uriya mugabo aricwa.
Ng’uko uko abakozi ba MOSSAD bishe uriya mugabo bafataga nk’umwe mu banzi bakomeye ba Leta ya Kiyahudi.
Ikigo MOSSAD cyashinzwe na David Ben Gourion wabaye Minisitiri w’intebe wa mbere wa Israel.
Hari ku itariki 13, Ukuboza, 1949.
Hagati aho hari andi makuru avuga ko abakozi ba MOSSAD baherutse gutsinda muri Hotel umugabo wo muri Hamas witwa Mahmoud al-Mabhouh bamusanze i Dubai.
Ibi ariko ariko Minisitiri w’ububanyi n’amahanga wa Israel Avigdor Lieberman, aherutse kubihakana.
