Mu gihe hasigaye igihe gito ngo amatora y’Umukuru w’igihugu muri Repubulika ya Demukarasi ya Congo abe, (ateganyijwe mu Ukuboza, 2023), uwahoze ayobora iki gihugu, Joseph Kabila aherutse gukoresha inama n’abayoboke ababwira ko ari maso.
Bisa n’aho uyu mugabo wigeze kuyobora DRC kugeza mu mwaka wa 2018, afite umugambi wo kongera kwiyamamaza n’ubwo atarerura ngo abivuge.
Aharutse guhuriza abayoboke b’ishyaka rya FCC ahitwa Kingakati ababwira ko agifite ‘umutima ukunze Congo’.
Kabila yababwiye ko igihe kigeze ngo agaruke, asubize ibintu ku murongo.
Avuga ko igihugu cye kiri mu bibazo cyatewe n’imiyoborere idahwitse.
Ikibabaje, nk’uko umunyamakuru wa Afrikarabia wari muri kiriya kiganiro abivuga, cyane kuri Kabila ni uko iyi rwaserera ikiri mu gihugu mbere y’amezi make ngo kijye mu matora y’Umukuru w’Igihugu.
Icyakora Kabila avuga ko atazitabira ayo matora igihe cyose ibintu bizaba bitarashyirwa ku murongo kugira ngo abe mu mucyo no bwisanzure.
Afrikarabia ivuga ko iyo myumvire ayisangiye n’abandi banyapolitiki barimo Martin Fayulu na Moïse Katumbi.
Mu kiganiro yahaye abari baje kumwumva, yabahishuriye ko atarava mu ruhando rwa Politiki ya Repubulika ya Demukarasi ya Congo.
Arateganya kuzabwira abaturage ba DRC ijambo rirambuye ku buzima bwe bwa Politiki mu gihe kiri imbere.
Kuva yava ku butegetsi mu mwaka wa 2018, abahoze ari inkoramutima ze bahisemo kumuvaho bagana uruhande rwa Perezida Felix Tshisekedi.
Abo ni uwahoze ari Minisitiri w’ubutegetsi bw’igihugu Evariste Boshab, uwari ushinzwe ubutabera Célestin Tunda, Léonard She Okitundu, Adolphe Lumanu, André-Alain Atundu na Lambert Mende wari umuvugizi wa Guverinoma ya Kabila.
