Kabuga Félicien uregwa ibyaha bya Jenoside agiye gusubira imbere y’abacamanza b’Urwego rwasigariyeho inkiko mpuzamahanga mpanabyaha, IRMCT, mu gikorwa gitegura urubanza rwe mbere y’uko rutangira kuburanishwa mu mizi.
Ni icyemezo cyafashwe n’umucamanza wahawe inshingano zo gukurikirana imirimo mbanzirizarubanza, Ian Bonomy, ku wa 11 Mutarama 2022, ko Kabuga azasubira imbere y’inteko y’abacamanza ku wa Kane tariki 3 Gashyantare 2022.
Bizaba ari saa 14:30 ku isaha y’i La Haye mu Buholandi, ni ukuvuga saa 15:30 ku isaha y’i Kigali.
Uyu mugabo ufatwa nk’umwe mu baterankunga bakomeye ba Jenoside yakorewe Abatutsi mu 1994, yafatiwe mu Bufaransa ku wa 16 Gicurasi 2020.
Ku wa 26 Ukwakira 2020 Kabuga yoherejwe by’agateganyo muri gereza y’Umuryango w’Abibumbye ku ishami ry’ i La Haye mu Buholandi, mu gihe hagikorwa isesengura ku buzima bwe harebwa niba yazaburanishirizwa i Arusha muri Tanzania.
Yagejejwe bwa mbere imbere y’urukiko ku wa 11 Ugushyingo 2020.
Bijyanye n‘icyorezo cya COVID-19 n’imiterere y’ubuzima bwa Kabuga w’imyaka 88, ku wa 9 Werurwe 2021 urukiko rwemeje ko inama ntegurarubanza izwi nka ‘status conference’ ishobora kuba mu buryo bw’inyandiko, buri wese akagaragaza impungenge yaba afite kuri dosiye, ibintu byamera neza inama zikazaba imbonankubone.
Ni igikorwa cyasojwe ku wa 6 Mata 2021, inama z’imbonankubone ziba ku wa 1 Kamena 2021 no ku wa 6 Ukwakira 2021.
Muri iyo nama niho habera ibiganiro hagati y’ababuranyi, hagasuzumwa imiterere y’urubanza no guha uregwa umwanya wo kugaragaza inzitizi yaba afite zirimo izishobora kuba zjyanye n’ubuzima bwo mu mutwe cyangwa umubiri.
Itegeko rigena ko ‘status conference’ itumizwa mu minsi 120 uhereye igihe uregwa yagerejwe imbere y’urukiko bwa mbere na nyuma y’iminsi 120 uhereye ku nama iheruka.
Umucamanza yavuze ko ku wa 3 Gashyantare Kabuga ashobora guhitamo kwitabira iyi nama mu buryo b’ikoranabuhanga cyangwa akiyambura uburenganzira bwo kuyitabira, aramutse abihisemo.
Aregwa ibyaha bitandatu birimo icyaha cya Jenoside, icyo gushishikariza abantu gukora Jenoside, icyaha cy’ubugambanyi mu gukora Jenoside n’ibyaha bitatu byibasiye inyokomuntu.
