Géraldine Mukeshimana aherutse gutabwa muri yombi na Polisi y’u Rwanda imufatanye udupfunyika 200 tw’urumogi.
Undi wafashwe ni umucuruzi witwa Rukabu Nizeyimana Patien w’imyaka 45 ariko we yahise atoroka.
Mukeshimana afite imyaka 26 y’amavuko.
Ishami rya Polisi y’u Rwanda rishinzwe kurwanya ibiyobyabwenge, Anti Narcotic Unit, niryo ryabafashe.
Umuvugizi wa Polisi mu Ntara y’Amajyepfo, Chief Inspector of Police (CIP) Emmanuel Habiyaremye avuga ko uriya mugore yafashwe nyuama y’amakuru yari amaze gutangwa n’abaturage.
Ati: “Abapolisi bo mu ishami rishinzwe kurwanya ibiyobyabwenge bahawe amakuru n’umuturage wo mu mu Mudugudu wa Nyabitare ko Mukeshimana azwiho gucuruza urumogi kandi bikekwa ko avuye kururangura.”
Ngo hahise hatangira ibikorwa byo kumucungira hafi kugira ngo aze gufatwa.
CIP Habiyaremye avuga ko ku ikubitiro basanze uriya mugore afite udupfunyika 200 ariko ajya kubereka aho yari avuye kururangura bahasanga utundi dupfunyika 2,200.
Bahasanze n’a Frw 136,000 y’urwo yari yararangije kugurisha.
CIP Habiyaremye yashimiye uwatanze amakuru yatumye ibi biyobyabwenge bifatwa.
Uwafashwe n’ibiyobyabwenge byafashwe yashyikirijwe Urwego rushinzwe ubugenzacyaha (RIB) kugira ngo hakomeze iperereza mu gihe hagishakishwa uwatorotse ngo na we ashyikirizwe ubutabera.
Iteka rya minisitiri nº 001/moh/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira ikiyobyabwenge cy’urumogi mu biyobyabwenge bihambaye.
Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.
Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.
