Abarwanyi ba M23 bafashe Luhwinja muri Kivu y’Amajyepfo ahantu hakize cyane kuri zahabu.

Bivugwa ko abo barwanyi bahafashe batarwanye.

Abahatuye babwiye Radio Okapi ko aha ari ahantu ha mbere bafashe muri ako gace nyuma y’uko bafashe umujyi wa Bukavu muri Kivu y’Amajyepfo, hari tariki 14, Gashyantare, 2025.

Abo barwanyi kandi baherutse no kwirukana abarwanyi ba Wazelendo n’ingabo za DRC zari yarigaruriye ahitwa Kaziba.

Guhera kuri uyu wa Kabiri kandi abo barwanyi bafashe ibice bya Luchiga, Kabalole, Luduha na Idudwe.

Umwe mu baturage w’ahitwa Twangiza hari ibirombe bikomeye, avuga ko M23 ikataje igana aho hantu.

Avuga ko ari mu ntera ya Kilometero eshanu na mbere yo kugera ahitwa Luchiga, aha hakaba hubatse uruganda rw’abanya Canada rutunganya zahabu ruherutse kugurwa n’Abashinwa.