Umukinnyi wa Benediction, Manizabayo Eric wamamaye ku izina rya Karadiyo na Umwimikazi Djazila baraye begukanye isiganwa ry’amagare ryo kwibuka ku nshuro ya 30 Jenoside yakorewe Abatutsi muri Mata 1994 ryitwa Race To Remember.
Iryo siganwa ryabaye kuri iki Cyumweru taliki 28, Mata, 2024, rikaba isiganwa ritegurwa n’Ishyirahamwe ry’Umukino wo gusiganwa ku magare, FERWACY, ifatanyije na Minisiteri ya Siporo na Komite Olempike y’u Rwanda.
Abagore, abangavu n’abasiganwa batarabigize umwuga bahagurukiye kuri Canal Olympia (Rebero), bakomereza i Nyamata, basoreza aho batangiriy ekuri Canal Olympia, ni ukuvuga urugendo rw’intera y’ibilometero 71,8.
Ingimbi, abasore (U23) n’abagabo na bo bahagurukiye kuri Canal Olympia bakatira i Nemba( Umurenge wa Bugesera), basoreza kuri Canal Olympia ku ntera y’ibilometero 113.
Mu bagabo Imanizabayo Eric Karadiyo ni we wabaye uwa mbere.
Yasize Byukusenge Patrick wa Java-InovoTec n’Umunya-Eritrea Amani Awet wa CMC World Cycling Centre akoresheje amasaha abiri, iminota 44 n’amasegonda 57.
Mu bagore bakoze intera y’ibilometero 71,8 Mwamikazi Djazila wa Ndabaga Women Cycling Team aba ari we utsinda iri siganwa.
Yakoresheje isaha imwe, iminota 47 n’amasegonda 23, akurikirwa na Mukashema Josiane wa Benediction naho Ntakirutimana Marthe (wa Ndabaga Women Cycling Team) aba uwa gatatu.
Mu Cyiciro cy’abangavu, Iragena Charlotte ni we wahize bagenzi be akurikirwa na Uwiringiyimana Liliane na Mutoni Sandrine.
Mu ngimbi, Twagirayezu Didier wo mu ikipe ya Kayonza Cycling Stars, ni we wabaye uwa mbere akurikirwa na Ntirenganya Moïse na Juliana Ndrramanampy.
Mu batarengeje imyaka 23, Aweti Amani yabaye uwa mbere akurikirwa na Tuyizere Étienne na Ngendahayo Jéremie.
Mu batarabigize umwuga (Amateurs), Ndirishe Jeannot yahize bagenzi be akurikirwa na Kayinamura Patrick na Twagirimana Léandre.
Hahembwe kandi abakinnyi babiri bakinnye bafite ubumuga bw’ingingo mu kugaragaza ko na bo bashoboye.
Kugeza ubu, habarwa abanyamuryango barindwi b’Ishyirahamwe ry’umukino w’amagare mu Rwanda (FERWACY) barimo Sakumi Anselme wari Visi Perezida waryo, ko ari bo bishwe muri Jenoside yakorewe Abatutsi mu 1994.
Abitabiriye ririya siganwa basuye Urwibutso rwa Jenoside rwa Nyanza ya Kicukiro bunamira inzirakarengane zihashyinguwe.
“Race to Remember” yatangiye gukinwa kuva mu 2016, ariko mu 2020 na 2021 ntiryabaye kubera Guma Mu Rugo n’izindi ngamba zo kwirinda COVID-19.
Ni isiganwa ryari ryitabiriwe n’abayobozi batandukanye barimo abagize Komite Nyobozi ya FERWACY Visi Perezidante wa Kabiri wa Komite Olempike y’u Rwanda, Umutoni Salama n’abandi.
