Minisitiri w’Intebe Wa Sudan n’Abagize Guverinoma Benshi Batawe Muri Yombi

Inzego za gisirikare muri Sudan zataye muri yombi Minisitiri w’Intebe Abdalla Hamdok n’abaminisitiri benshi, mu gikorwa gisa no gusubiza ububasha bwose mu maboko y’abasirikare nk’uko amakuru ava muri icyo gihugu abyemeza.

Kuri uyu wa Mbere ibintu byazindutse bimeze nabi muri Sudan, internet ikurwaho ndetse n’irindi tumanaho ryose ntabwo ririmo gupfa gukunda.

Inzego ziharanira demokarasi muri Sudan zahise zisaba abaturage kwirara mu mihanda, ngo zikumire umugambi w’igisirikare.

Minisiteri y’Itangazamakuru muri Sudan yatangarije kuri Facebook ko abantu bitwaje intwaro bafashe Minisitiri w’Intebe Hamdok bakamujyana mu nzu afungiwemo.

Sudan yari imaze iminsi ibintu byifashe nabi, nyuma y’uko mu kwezi gushize byatangajwe ko haburijwemo umugambi wo guhirika ubutegetsi. Abantu benshi barimo abasirikare bahise batabwa muri yombi.

Ni ibintu byongereye umwuka mubi hagati y’abategetsi ba gisirikare na gisivili, bayoboye igihugu mu nzibacyuho guhera muri Kanama 2019, nyuma y’ihirikwa rya Omar al-Bashir wayoboraga icyo gihugu.

Biteganywa ko umuyobozi ukuriye abayoboye inzibacyuho, Gen Abdel Fattah al-Burhan, aza kuvuga ijambo ku birimo kuba mu gihugu.