Umwe mu ba dipolomate yatangaje ko mu mpera z’Icyumweru gishize hari ubwato bwa Misiri bwagejeje intwaro muri Somalia mu rwego kubakira iki gihugu ubushobozi mu bya gisirikare.
Ni igikorwa kiri mu mugambi mugari wa Misiri wo guhangana na Ethiopia, igihugu bihora mu makimbirane bipfa guharanira kugira ijambo mu karere no gukoresha amazi ya Nili ku kigero kinini.
Muri Kanama, 2024 Cairo yasinyanye na Mogadishu amasezerano yo gufatanya mu bya gisirikare, ayo akaba ari yo ashingirwaho Misiri yoherereza Somalia intwaro.
Ku ruhande rwa Ethiopia, nayo iherutse gusinyana amasezerano n’Intara ya Somaliland, iyemerera ko izajya iyifata nk’’igihugu kigenga hanyuma Somaliland igaha Ethiopia ubutaka izubakaho icyambu.
Misiri yahise yamagana ayo masezerano ivuga ko adahuje n’ibisanzwe biranga imikoranire hagati y’ibihugu bifite ubwigenge bwemewe muri UN.
Ku Cyumweru gishize no ku wa Mbere w’iki kiri kurangira nibwo ingabo za Misiri zagejeje ku cyambu cya Somalia intwaro nyinshi zazanywe n’ubwato.
Umwe mu bakozi mu Biro bya Minisitiri w’Intebe wa Somalia witwa Nasra Bashir Ali yemereye Reuters ko ibyo byabaye ndetse ashyira n’ifoto ye kuri X ahagaze yitegereza uko izo ntwaro zipakururwa.
Hagati aho kandi ubutegetsi bwa Misiri buherutse kuburira abaturage bayo baba muri Somalia ko bakwiye kuzibukira kujya muri Somaliland kuko hashobora kubateza akaga.
