Polisi y’u Rwanda itangaza ko mu minsi ine ishize hasohotse amabwiriza mashya yo kwirinda COVID-19 harimo na Guma mu Karere na Guma mu Mujyi wa Kigali, abantu 35 000 bafashwe bayishe.
Umuvugizi wayo Commissioner of Police( CP) John Bosco Kabera avuga ko iriya mibare igaragaza ko abantu bakomeje kwica ariya mabwiriza.
Avuga ko ari imibare minini kuko ubusanzwe hari ubwo habarurwaga abantu 11 000 mu Cyumweru, ariko ngo kuba kugeza ubu ari abantu 35 000 mu minsi ine byerekana ko ari ‘ikibazo gikomeye.’
Ikindi Polisi ivuga ko giteye inkecye ni uko hari abantu benshi bakomeje kujya muri za Sauna ngo biyuke ibyuka hanyuma bumve ko bakira COVID-19.
Ikindi Polisi yabonye ni uko hari abantu bajya gusura abarwayi ba COVID-19 mu ngo zabo.
Imibare Umuvugizi wa Polisi y’u Rwanda avuga ko bakusanyije muri iyi minsi ine ingamba nshya zo kwirinda COVID-19 zimaze zitangajwe yerekana ko hafashwe imodoka 200 zigenda amasaha y’umukwabo yageze, Moto zirenga 200 n’abantu 1000 bafatiwe mu ngo bazihinduye akabari.
Ati: “ Iyo urebye ukuntu ubwandu bwiyongera, abarwara kiriya cyorezo n’abo gihitana bakiyongera ariko ukabona abantu barengaho bakica amabwiriza yo kucyirinda wibaza impamvu. Tuzakomeza gukangurira abantu kucyirinda, ababirenzeho tubahane.”
Ni ubwa mbere mu Rwanda hapfuye abantu icyenda bazize COVID-19 mu munsi umwe nk’uko imibare yaraye itangajwe na RBC yabitangaje.
Mu bapfuye harimo n’uruhinja rufite amezi atanu y’amavuko.
