Mu Murenge wa Muko mu Karere ka Musanze hari umwana w’umukobwa w’imyaka 12 urera abavandimwe be batatu. Abaturanyi b’abo bana babwiye itangazamakuru ko abo bana bagiye kumara imyaka ibiri bibana.
Ababyeyi babo barafunzwe, Nyina afungiye mu igororero rya Musanze na Se ari mu kigo cy’inzererezi cya Kinigi.
Abo bana baba mu Mudugudu wa Nyiramuko mu Kagari ka Cyivugiza mu Murenge wa Muko ho mu Karere ka Musanze, barerwa n’umukuru muri bo witwa Umuhoza Junior ubivanga no kujya kwiga.
Bagenzi bacu ba IGIHE bavuga ko uwo mwana w’umukobwa yiga mu mwaka wa kane w’amashuri abanza, musaza we akiga mu mwaka wa wa kabiri, naho umuto muri bo atangiye mu mashuri y’inshuke.
Nyina yitwa Uwamahirwe Philomѐne agororerwa mu Igororero rya Musanze akaba yarafunzwe nyuma yo gukurikiranwaho ko yabikuje amafaranga y’undi muntu kuri telefoni ahamywa icyaha ahanishwa gufungwa imyaka ibiri, biteganyijwe ko izarangira muri Gicurasi 2025.
Se w’aba bana we yitwa Mugiraneza Elie akaba ari muri Transit Center ya Kinigi kuko yafashwe akekwaho kwiba, akaba amazemo amezi atandatu.
Amakuru avuga ko kugira ngo abo bana babayeho kubera ubugiraneza bw’umuturanyi wabo ubamenyera amafunguro iyo bavuye ku ishuri, barangiza kurya bakajya kuryama mu nzu yabo BONYINE.
Umuhoza( mukuru w’abo bana bose ari nawe ubarera) asaba uwagira ubushobozi bwo kubitaho uwo ari we wese ko yabatabara kuko babayeho nabi kandi bonyine.
Yagize ati: “Hari umuntu wadufashije uduha ibiryo no ku ishuri hari ibikoresho ntari nabona kandi naho tujyayo rimwe na rimwe. Ababyeyi banjye barabafunze icyo gihe nigaga mu mwaka wa kabiri. Twajyaga mu ngo zose aho tugeze bakatugaburira. Turifuza ko bajya badufasha tukiga kuko nta bene wacu dufite hafi hano”.
Umwe mu baturanyi b’aba bana yavuze ko ubuzima bwabo ari ikibazo gikomeye cyane.
Impamvu ni uko bidakwiye ko abana bato bato bene kariya kageni babaho bonyine, nta muntu mukuru ubitaho.
Ati: “ Birababaje kubona abana bangana gutya bibana mu nzu, bakeneye kwitabwaho ngo bige, bagaburirwe, bagurirwe ibikoresho n’ubundi burere . Ariko urabona ko nk’abana bibana n’umutekano wabo uba uhangayikishije”.
Umunyamabanga Nshingwabikorwa w’Umurenge wa Muko witwa Janvier Bisengimana yavuze ko ikibazo cy’abo bana ‘atakizi’.
Avuga ko agiye kubaza akumva uko bimeze n’ubwo urugo abo babamo ruri mu ntambwe nke uvuye ku biro by’Akagari n’Umurenge.
Umuyobozi w’Akarere ka Musanze wungirije ushinzwe imibereho myiza y’abaturage, Kayiranga Théobald, yavuze ko nawe iki kibazo yakibajije Umunyamabanga Nshingwabikorwa w’Umurenge wa Muko akamubwira ko nyirarume w’abo bana agiye kubatwara akajya kubarera.
Kayiranga ati: “Nta makuru mfite ahagije kuri kiriya kibazo ariko gitifu yambwiye ibintu bibiri. Yambwiye ko koko ababyeyi ba bariya bana bafunzwe, byo ni n’ibishoboka ko abantu bashobora kubafunga. Ambwira ko bariya bana mu minsi yashize hari umugore wabareraga, uyu munsi rero yambwiye ko nyirarume yaraye abatwaye, ni ibyo twabashije kumenya”.
