Perezida Paul Kagame yaraye yakiriye Umuyobozi wungirije wa Komisiyo y’Umuryango w’Afurika yunze ubumwe Dr. Monique Nsanzabaganwa ari kumwe n’umuyobozi we Dr Moussa Faki Mahamat.

Faki na Nsanzabaganwa bari bari kumwe  n’umuyobozi muri uyu muryango ushinzwe imikorere y’inzego n’ivugurura witwa Prof. Pierre Moukoko Mbonjo.

Baganiriye na Perezida Kagame uko imivugururire y’inzego z’uyu muryango iteye muri iki gihe.

Kuri uyu wa Kane i Kigali haratangira umwiherero w’abagize Komite y’Umuryango w’Afurika yunze ubumwe.

Dr. Monique Nsanzabaganwa ni Umunyarwandakazi waminuje mu by’ubukungu.

Mu muryango w’Afurika yunze ubumwe ashinzwe imari n’ubutegetsi, akaba umuntu uba hafi umuyobozi wa Komisiyo y’Afurika yunze ubumwe mu gutuma inshingano ze zose zikorwa mu buryo bwuzuye.

Amategeko y’Umuryango w’Afurika yunze ubumwe avuga ko iyo Dr Mussa Faki Mahamat( akomoka muri Tchad) adahari, umwungirije( muri iki gihe ni Dr. Monique Nsanzabaganwa) ariwe uyobora Umuryango w’Afurika yunze ubumwe.