Birashishikaje kumva ko ubuyobozi bukuru bw’ingabo izo ari zo zose bwasohoye itangazo rigacishwa kuri X busaba ko buri musirikare ufite ipeti rya Lieutenant Colonel kuzamura atemerewe gukoresha mu kazi ka gisirikare indi telefoni itari iPhone.
Ibi rero nibyo byemejwe n’ingabo za Israel aho kuri X zavuze ko ibyo gukoresha telefoni zikoresha ubuhanga bwa Android bitemewe muri bariya basirikare bakuru mu gihe cyose bavugana cyangwa bandika iby’akazi.
Radio y’ingabo z’iki gihugu niyo yabaye iya mbere yabitangaje ariko na Jerusalem Post na Forbes Magazine birabyandika.
Mu itangazo handitsemo ko iki cyemezo cyafashwe mu rwego rwo gukumira ko abanzi ba Israel bakwinjra mu ikoranabuhanga ry’izo telefoni bakamenya ibyo baganira kandi ibyo byakururira igihugu kabutindi.
Ndetse ngo ibi byigeze no kubaho na mbere y’intambara yeruye hagati ya Hamas na Israel yatangiye Tariki 07 Ukwakira, 2023 kuko byagaragaye ko hari ibitero by’ikoranabuhanga byagabwaga kuri telefoni z’ingabo za Israel mu buryo runaka.
Ku rundi ruhande, ikigo Google giherutse gutangaza ko gifitanye amasezerano n’igisirikare cya Amerika yo gukoresha telefoni za Google Pixel kuri ba ofisiye kuko ubu ngo zahawe ikoranabuhanga rizirinda kwinjirirwa n’abatifuzwa.
Ni uburyo bise Advanced Protection Mode bwa Google Pixel.
Ubwo buryo ariko Israel ntibushira amakenga cyanecyane ko itinya ko Hezbollah yabukoresha ikagira uko ihungabanya imikorere y’ingabo zayo.
Icyakora telefoni za Android zemewe mu bindi bidafite aho bihuriye n’akazi ka gisirikare.
Ifoto: Telefoni ya iPhone yakozwe n’ubwenge buhangano
