Perezida Paul Kagame yavuze u Rwanda rushobora gufata ingamba zikomeye kubera ubwandu bwa COVID-19 bwongeye kuzamuka hirya no hino, ndetse n’imibare y’abandura mu Rwanda ica amarenga.
Urugero nko ku Cyumweru gishize abarwayi bashya bari 34. Hari hashize iminsi haboneka abarwayi bari munsi ya 100 ku munsi, ku buryo ingamba nyinshi zari zimaze koroshywa.
Muri iki cyumweru ibintu byarahindutse. Ku wa Mbere habonetse abanduye bashya 62, ku wa Kabiri haboneka 127, ku wa Gatatu haboneka 114, ku wa Kane baba 112, kuri uyu wa Gatanu haboneka abanduye bashya 202.
Ni ukuvuga ko muri iyi minsi itandatu ishize habonetse abarwayi bashya 651, hapfamo abantu umunani. Imibare y’abakirwaye nayo yavuye kuri 660 yabarwaga ku Cyumweru gishize, ubu ni 1153.
Mu kiganiro yagiranye n’abavuga rikumvikana bo mu turere twa Musanze na Rubavu kuri uyu wa Gatanu, yavuze ko u Rwanda rwari mu nzira nziza yo guhangana n’iki cyorezo, ndetse ko rwagize amahirwe rubona inkingo nubwo zidahagije.
Yasabye abaturage kutirara ngo boroshye ibintu kandi bikomeye.
Yakomeje ati “Wenda turaza gusubira mu kongera gufunga, byongere bidusubize inyuma gato ku bukungu, kuko turagenda tubona ibimenyetso biva hakurya y’imipaka byerekana ko hari irindi zamuka rya virusi rya gatatu.”
“Ubungubu ngirango riragenda riza, ahandi ho ryarahageze murabibona no mu mafoto, murabibona mu makuru hari abamerewe nabi, ntabwo twifuza ko, nabo iyaba bitabageragaho, ariko natwe ntabwo twifuza ko bitugeraho. Mugomba rero gufata ingamba zihamye.”
Yabwiye abavuga rikumvikana ko igihe ibyemezo nka biriya byo gufunga ibikorwa bitandukanye bifashwe bakwiye kubyumva, kuko bifatwa mu nyungu z’abaturage.
Ati “Ntabwo ari byiza ariko ibishobora kuba tutakurikije imyiwarire imwe, byaba hanyuma inshuro icumi y’ibyo duhura nabyo.”
Abamaze guhitanwa na COVID-19 mu Rwanda bose hamwe ni 368.
Abamaze gukingirwa ni 389.399 hakoreshejwe inkingo za Pfizer na AstraZeneca.
Intego ni ugukingira abaturarwanda 60% bangana na miliyoni 7.8, mbere y’uko umwaka wa 2022 urangira.
