Ikipe ihagarariye u Rwanda mu mikino ya BAL, RSSB-Tigers yatsinze ikipe yo muri Angola iri mu zikomeye yitwa Petro du Luanda, bituma amahirwe yayo yo gukomeza mu yindi mikino igize iri rushanwa yiyongera.
Umukino waraye ubaye kuri iki cyumweru niwo RSSB Tigers BBC yatsinzemo Petro du Luanda ibitego 82 kuri 78.
Aya makipe ari kumwe n’andi yo mu gace ka Afurika yo Hagati n’Amajyepfo bita Kalahari Conference, Kalahari rikaba izina ry’Ubutayu bukora kuri Namibia, Botswana na Afurika y’Epfo.
Intsinzi ya RSSB Tigers BBC ni iya kabiri nyuma y’iya mbere yatsinze Al Ahly yo muri Libya ku manota 103 kuri 93, hakaba hari mu mukino wa ubanza w’amakipe agize rya tsinda rya Kalahari rivugwa haruguru, imikino yose ikaba iri kubera i Pretoria muri Afurika y’Epfo.
Agace ka mbere k’umukino kegukanywe na Petro du Luanda n’amanota 17 kuri 12 ya RSSB-Tigers. Aka kabiri kegukanwa na RSSB-Tigers itsinze Petro amanota 22 kuri 19, ubwo iba izamutse ityo.
Ubwo bari bavuye kuruhuka, RSSB-Tigers yakomeje kotsa igitutu Petro du Luanda maze yegukana agace ka gatatu n’amanota 23 kuri 20 ya Petro du Luanda.
Mu gace ka kane ari nako ka nyuma, kongeye kwegukanwa na RSSB-Tigers itsinze Petro du Luanda amanota 25 kuri 22 maze umukino urangira ikipe ya RSSB -Tigers iwegukanye muri rusange n’amanota 82 kuri 78.
Umukinnyi wa RSSB- Tigers Leonard Craig Randall niwe wongeye kuyobora abatsinze amanota menshi aho yatsinze amanota 26 wenyine.
Tigers izongera gukina kuri uyu wa Gatatu tariki 01, Mata, 2026 ihure na Johannesburg Giants Basketball Club yo muri Afurika y’Epfo.
Nikomeza gutsinda, bizatuma yemererwa gukina imikino ya nyuma (Playoffs) izabera i Kigali muri Mata, uyu mwaka.
