Ambasade ya Suède yatangaje ko icyo gihugu cyahaye u Rwanda inkingo 1,000 000 za COVID-19 zo mu bwoko bwa Moderna, zigiye kwifashishwa mu kurushaho gukingira abaturage benshi.
Ni inkingo zibonetse mu gihe u Rwanda rwamaze kugera ku ntego yo gukingira abaturage 30% mbere y’uko uyu mwaka urangira, ndetse gahunda ni uko umwaka utaha uzarangira rumaze gukingira hejuru ya 60%.
Kuri uyu wa Kane iyi ambasade yatangaje iti “Twishimye gutangaza ko inkunga ya Suède y’inkingo 1,000 000 za COVID-19 za Moderna zahageze. Inshinge 1,000 000 nazo zizakurikiraho mu minsi mike.”
Happy to announce that #Sweden's donation of 1,000 000 Moderna #COVID19 vaccines has arrived!
1,000 000 syringes soon to follow 🙏🙏 @unicefrw for facilitating!
We salute the effective #covid19 response by @RwandaGov. Fantastic work on-going to #vaccinateRwanda!@EUinRw #RWoT pic.twitter.com/B2S9pGV9PD
— Sweden in Rwanda (@SwedeninRW) December 9, 2021
Ni inkingo zibonetse nyuma y’iminsi mike u Bwongereza nabwo buhaye u Rwanda inkingo miliyoni 1.1 za COVID-19 zo mu bwoko bwa AstraZeneca, zizunganira gahunda yo gukingira iki cyorezo abantu benshi bashoboka.
Minisitiri w’Intebe Dr Edouard Ngirente aheruka kubwira abadepite ko nyuma yo kongera ingimbi n’abangavu bafite imyaka iri hagati ya 12-17 mu bagomba gukingirwa, imibare yabo yahise iva kuri miliyoni 7.8 zateganywaga igera kuri miliyoni 9 zirengaho gatoya, bingana n’abaturage 69.4%.
Ati”Aba bose bazaba bamaze gukingirwa bitarenze Ukuboza umwaka utaha, ariko dukurikije imbaraga tubishyiramo dushobora no kuzabigeraho mbere yaho.”
Izo nkingo kandi ziyongera ku zindi 165,600 u Budage buheruka guha u Rwanda zo mu bwoko bwa Astra Zeneca.
Kugeza ubu abaturarwanda bakingiwe byuzuye ni miliyoni 3.9, abahawe nibura urukingo rumwe ni miliyoni 6.5 mu gihe abahawe urukingo rushimangira ari ibihumbi 13.
