Kimwe mu byemerejwe mu ruzinduko rw’iminsi ibiri Perezida Paul Kagame ari gukorera muri Algeria ni uko u Rwanda rugiye kuhafungura Ambasade.
Algeria ni igihugu cyo mu Majyaruguru ya Afurika.
Perezida Tebboune ukiyobora niwe watumiye Paul Kagame ngo baganire uko Kigali na Alger byabana mu butwererane bushingiye ku korohereza ingendo z’indege, gukuraho visas, imikoranire ya za Polisi, inganda z’imiti, Kaminuza n’amashuri makuru, ubuhinzi, ishoramari, ikoranabuhanga mu itumanaho, ubutabera, gusangira ubunyamwuga no guteza imbere ishoramari.
Mu kiganiro Abakuru b’ibihugu byombi bahaye itangazamakuru, Kagame yababwiye ko ‘bidatinze’ u Rwanda ruzafungura Ambasade yarwo muri Algeria.
Algeria: Igihugu gikize muri Afurika yose
Repubulika y’abaturage ya Algeria ni igihugu kiri mu Majyaruguru ya Afurika gifite umurwa mukuru Alger ukora ku Nyanja ya Méditerranée.
Kiba mu gice cya Afurika bita Maghreb. Mu Majyaruguru ashyira Uburasirazuba bwayo hari Tunisia, mu Burasirazuba hakaba Libya, mu Majyepfo ashyira Uburasirazuba hakaba Niger, ashyira Uburengerazuba hakaba Mali, Mauritania na Sahara y’Uburengerazuba.
Mu Burengerazuba bwa Algeria haba Marocco hanyuma mu Majyaruguru ya Algeria hakaba Inyanja ya Méditerranée.
Iki gihugu gifite Intara 58, zigabanyijemo ibyo bita Communes 1,541.
Algeria nicyo gihugu gikize kurusha ibindi byo muri Maghreb kandi kikaba igihugu gikomeye muri Afurika yose.
Iyo barebye imibereho ya buri muturage muri buri gihugu cya Afurika, abaturage ba Algeria nibo bigaragara ko babayeho neza kurusha ahandi hose.
Ubu buryo abahanga mu bukungu babwita Human Development Index.
Algeria ni iya 16 ku isi mu gucukura petelori ikaba iya 19 mu gucukura gazi.
Ibi bituma yinjiza amafaranga menshi atuma ikira cyane.
Ikigo cyayo gishinzwe gucukura no gutunga ibyo byombi kitwa Sonatrach nicyo cya mbere muri Afurika, kikabigurisha mu Burayi.
Igisirikare cya Algeria nicyo cya mbere gifite ingengo y’imari nini muri Afurika yose ndetse kirusha na Misiri isanzwe izwiho kugira igisirikare gikomeye kubera gufashwa na Leta zunze ubumwe z’Amerika.
Bivugwa ko igisirikare cya Algeria ari icya 22 gikomeye ku isi.
Ubukungu bwayo bwatumye ijya mu miryango mpuzamahanga ikomeye mu bucuruzi na politiki irimo uw’ibihugu bicukura petelori witwa OPEC, Afurika yunze ubumwe, Umuryango w’Ibihugu by’Abarabu, Umuryango w’Abibumbye n’Umuryango w’ibihugu bigize Maghreb.
