Amakipe y’u Rwanda yamaze kugera ku mukino wa nyuma mu cyiciro cy’abatarengeje imyaka 11 n’icy’abaterengeje imyaka 13 mu irushanwa rihuza amashuri y’Umupira w’Amaguru ya Paris Saint-Germain ku Isi ririmo kubera mu Bufaransa.
Marie Grâce Nyinawumuntu utoza aya makipe avuga ko abana atoza bitwara neza kandi hari icyizere ko bazatwara igikombe.
Abana b’Abanyarwanda bageze kuri uriya mwanya nyuma yo gutsinda Ubuhinde bw’Uburengerazuba ibitego 5-2 mu batarengeje imyaka 11 ndetse n’ibitego 4-0 mu bantarengeje imyaka 13.
Bivuze ko u Rwanda ruzakina na Brésil ku mikino ya nyuma mu byiciro byose.
Ishuri rya Paris –Saint Germain ritoza abana b’u Rwanda rikorera mu Karere ka Huye.
Mu Ukuboza, 2023 ubwo hatahwaga iri shuri, uwari Umunyamabanga uhoraho muri Minisiteri ya Siporo witwa Didier Maboko yavuze ko u Rwanda rwizeye ko abana batozwa na Paris Saint-Germain bazavamo abakinnyi beza bazazamura umupira w’amaguru ukaba mwiza kurushaho.
Icyo gihe uwavuze mu izina ry’itsinda ryari rihagarariye Paris Saint Germain witwa Nadia yavuze ko umushinga wo guteza imbere umupira w’amaguru mu Rwanda, ufite aho uhuriye n’umubano mwiza hagati y’u Rwanda n’u Bufaransa ‘uherutse gusubukurwa’.
Ambasaderi w’u Bufaransa mu Rwanda Antoine Anfré nawe yunze mu rya Nadia avuga ko imikoranire hagati y’u Rwanda n’u Bufaransa ifite byinshi ishingiyeho kandi izaramba.
Ishuri ryigisha umupira w’amaguru muri Huye rya Paris Saint Germain rifite umwihariko wo kwigisha abana b’abahungu n’abana b’abakobwa.
Niryo shuri ryonyine rifite uwo mwihariko mu yandi mashuri ya Paris Saint Germain ari hirya no hino ku isi.
Amakipe y'u #Rwanda yageze ku mukino wa nyuma mu cyiciro cy'abatarengeje imyaka 11 n'icy'abaterengeje imyaka 13 mu irushanwa rihuza za Amashuri y'Umupira w'Amaguru ya Paris Saint-Germain ku Isi ririmo kubera mu Bufaransa.
Ni nyuma yo gutsinda Ubuhinde bw'Uburengerazuba ibitego… pic.twitter.com/cZ528VgBSo— Rwanda Broadcasting Agency (RBA) (@rbarwanda) June 4, 2023
Indi wasoma:
Abana Batozwa Na Paris Saint Germain ‘Bazazana Impinduka’ Ku Mupira W’u Rwanda
