Minisiteri y’Ubuzima yatangaje ko 60% by’abaturarwanda bamaze gukingirwa COVID-19 mu buryo bwuzuye, intego yari yihawe ko izagerwaho mbere y’uko uyu mwaka wa 2022 urangira.

Ni urugendo rwatangiye muri Werurwe 2021 ubwo u Rwanda rwari rumaze kwakira inkingo 240.000 za AstraZeneca/Oxford zakozwe n’ikigo Serum Institute cyo mu Buhinde n’izindi nkingo 102,000 za Pfizer-BioNTech.

U Rwanda rwakomeje kubona inkingo nyinshi zaba izabonetse binyuze mu gahunda mpuzamahanga yo gufasha ibihugu kuzibona (COVAX), izo rwahawe n’ibihugu by’inshuti n’izaguzwe na leta.

Imibare ya Minisiteri y’Ubuzima yo kuri uyu wa Kane tariki 3 Werurwe igaragaza ko abaturarwanda bamaze guhabwa nibura urukingo rumwe ari miliyoni 8.8, naho abahawe inkigo ebyiri ni miliyoni 7.8.

Guverinoma y’u Rwanda yari yihaye intego yo gukingira 30% (3.915.533) by’Abanyarwanda bitarenze Ukuboza 2021 na 60% (7.831.066) bitarenze Ukuboza 2022.

Minisitiri w’Intebe Dr Edouard Ngirente mu Ukuboza 2021 yabwiye Inteko ishinga amategeko ko nyuma y’aho Guverinoma yiyemeje gukingira ingimbi n’abangavu bafite imyaka iri hagati ya 12 na 17, imibare y’abagomba gukingirwa COVID-19 mu Gihugu hose yiyongereye ikagera kuri 69,4%  by’abaturage bose, ni ukuvuga nibura 9.063.245.

Minisiteri y’Ubuzima yatangaje iti “Kugeza uyu munsi, 60% by’abaturarwanda bakingiwe COVID-19 mu buryo bwuzuye. Gahunda yo kugeza inkingo ku baturarwanda bose bagejeje igihe cyo kuzihabwa irakomeje.”

Biteganywa ko abagomba gukingirwa bose zaba bamaze kubona urukingo rwa COVID-19 bitarenze Ukuboza 2022.

Imibare ariko izakomeza kugenda ihinduka, urebye intambwe zimaze guterwa ahandi.

Nka Leta zunze Ubumwe za Amerika iheruka gutangiza ikingira rya COVID-19 no ku bana bari munsi y’imyaka 5, nyuma y’igihe abantu bayirengeje bose bahabwa inkingo.

Abari munsi y’iyo myaka bahabwa ingano nto y’urukingo rwa Pfizer/BioNTech igera kuri  microgram 3, mu gihe abana bafite hagati y’imyaka 5 na 11 bahabwa microgram 10, naho abantu bakuru guhera ku myaka 12 kuzamura bagahabwa microgram 30.

Ni mu gihe nko mu Rwanda kugeza ubu, abahabwa urukingo rwa COVID-19 ari abafite guhera ku myaka 12 kuzamura.

Abamaze guhabwa urukingo rwa gatatu rushimangira bose hamwe mu Rwanda ni miliyoni 1.7.

Iki cyorezo cya COVID-19 kimaze guhitana abaturarwanda 1458, bangana na 1.1% by’abantu 129,543 bamaze gusangwamo ubu burwayi.

Kugeza ubu u Rwanda rusigaranye abantu 156 barwaye COVID-19, nta n’umwe urembye.