Ishami ry’Umuryango w’Abibumbye ryita ku Buzima, WHO, ryongereye urukingo rwa CoronaVac rukorwa n’ikigo Sinovac cyo mu Bushinwa, mu nkingo zishobora kwifashishwa ku rwego mpuzamahanga mu gukingira COVID-19.
Ni icyemezo kigamije guha ibihugu icyizere ko ruriya rukingo rwujuje ibisabwa ku rwego mpuzamahanga mu mutekano no kuba rutanga umusaruro, ku buryo rushobora kwifashishwa mu guhangana na kiriya cyorezo.
Umuyobozi Mukuru wungirije wa WHO, Dr Mariângela Simão, yavuze ko isi ikeneye inkingo nyinshi za COVID-19, asaba ibigo bizikora kugira uruhare mu gusangiza abandi ubumenyi, kugira ngo isi ibashe guhagarika iki cyorezo.
WHO yatangaje ko yakoze igenzura rihagije ku rukingo rwa Sinovac-CoronaVac, haba ku rukingo ubwarwo ndetse n’aho rukorerwa.
Igenzura ryerekanye ko ruriya rukingo rurinda umuntu kugaragaza ibimenyetso bya COVID-19 ku gipimo cya 51%, ndetse rukarinda abantu kuremba kubera COVID-19 ku rwego rwa 100%, urebye ku bakoreweho ubushakashatsi.
Nyuma yo kwemeza ruriya rukingo, rwiyongereye ku rutonde rw’izindi zirimo kwifashishwa zemejwe ku rwego mpuzamahanga zirimo Pfizer/BioNTech, Astrazeneca, Moderna na Sinopharm.
Uru rukingo rurimo kwifashishwa mu bihugu bitandukanye, ndetse Uruguay iheruka gutangaza ko CoronaVac yagabanyije impfu za COVID-19 ku gipimo cya 97%.
