Guinea, igihugu cya mbere ku isi mu gutunganya no kohereza hanze bauxite(ni ibuye rifasha muri byinshi birimo no mu kubona irindi rya Alimunium), kiri mu biganiro n’amasosiyete acukura amabuye y’agaciro ku bijyanye n’ingamba zo kugabanya ingano ya bauxite ijyanwa ku isoko, hagamijwe kurinda igihugu igabanuka ry’ibiciro biri guterwa n’ubukungu bw’isi buri mu manegeka.
Niramuka ishyize izi ngamba mu bikorwa— nk’uko bisobanurwa na Minisitiri w’Amabuye y’Agaciro n’Ubumenyi ku Miterere y’Isi, Bouna Sylla—Guinea izaba ikurikiye urugero rwa Repubulika Iharanira Demokarasi ya Congo na Zimbabwe, byo byatangiye kugabanya kohereza hanze amabuye y’agaciro y’ingenzi yiganjemo ajyanwa mu Bushinwa.
Sylla yagize ati: “Iyi politiki igamije kugenzura ingano ya Bauxite icukurwa kugira ngo hatabaho igabanuka ry’ibiciro, bityo ntihagabanuke inyungu z’amasosiyete ndetse n’imisoro leta ikusanya.”
Yongeyeho ko ku wa 12 Werurwe, Leta yagiranye ibiganiro n’ihuriro ry’amasosiyete acukura amabuye y’agaciro kuri iki kibazo.
The Bloomberg ivuga ko ibi bihugu biri kwanga kugurisha amabuye yabyo ku giciro gito ahubwo bigategereza akazongera guhenda.
Ibiciro bya Bauxite—ibanza guhindurwamo aluminium—byaragabanutse hafi kimwe cya kabiri kuva mu ntangiriro za 2025.
Mu mwaka ushize, Guinea yohereje hanze toni miliyoni 183 za Bauxite, ziyongereyeho hejuru ya kimwe cya kane, kandi inyinshi zajyanywe mu nganda zitunganya zo mu Bushinwa. Iyi gahunda ya Guinea ishobora guteza igihombo mu rwego rw’inganda za aluminium zisanzwe zihanganye n’ibibazo byatewe n’intambara yo mu Burasirazuba bwo Hagati, yatumye zimwe mu nganda zitunganya aluminium zihagarara.
Akarere iyo ntambara iri kuberamo gatanga hafi 9% by’umusaruro wa Aluminium yose ku isi.
Nyuma y’itangazwa ry’iyi gahunda, ku isoko rya Shanghai Futures Exchange mu Bushinwa, igiciro cya Aluminium cyahise kizamuka hafi 5% ku wa Kabiri, kigera ku rwego rwo hejuru kuva muri Kanamaw, 2025.
Guinea irashishikariza abashoramari kutarenza urugero rw’umusaruro rwateganyijwe mu mishinga yabo no mu masezerano bagiranye na Leta.
Sylla yavuze ko iki cyemezo kizatangira gushyirwa mu bikorwa mu byumweru biri imbere, kandi kikazafasha guhuza umusaruro n’ibyoherezwa hanze mu mwwaka wa 2026 n’ibiteganywa mu nyigo z’imishinga.
Sosiyete Societé Minière de Boke—ifite abanyamigabane barimo China Hongqiao Group na Winning International Group yo muri Singapore—niyo yohereje hanze bauxite nyinshi kurusha izindi muri 2024, igera kuri toni miliyoni 71.5.
Hakurikiraho izindi sosiyete zirimo Aluminium Corp. of China na Compagnie des Bauxites de Guinee, ifitwemo imigabane myinshi na Rio Tinto Group.
Repubulika ya Demukarasi ya Congo na Zimbabwe na byo ni ibihugu bifatiye runini Ubushinwa mu kubuha ibyo bukoresha mu nganda zabwo zikora batiri z’imodoka, mudasobwa, ibyogajuru n’ibindi.
DRC ni iya mbere mu gutanga cobalt mu gihe Zimbabwe ari iya mbere mu gutanga Lithium.
Mu ntangiriro za 2025, Congo yahagaritse kohereza hanze cobalt kugira ngo izamure ibiciro, nyuma ishyiraho ingano ntarengwa mu Ukwakira uwo mwaka.
Mu kwezi gushize, Zimbabwe na yo yahagaritse kohereza lithium kugira ngo ihatire amasosiyete y’Abashinwa kubaka inganda zitunganya ayo mabuye imbere mu gihugu.
Guinea na yo irashaka ko Bauxite nyinshi itunganyirizwa imbere mu gihugu.
Sylla yagize ati: “Ibipimo igihugu giteganya gushyiraho birimo no gusaba ko amabuye atunganyirizwa aho acukurwa.”
Mu mwaka ushize, Leta ya Guinea yanze uburenganzira bwo gucukura Bauxite bwari bufite ishami rya Emirates Global Aluminum, iyegurira sosiyete ya Leta, ivuga ko itubahirije isezerano ryo kubaka uruganda rutunganya alumina.
Ati: “Ntabwo turi guhagarika kohereza hanze mu buryo bwa burundu, ahubwo turashaka kugenzura umusaruro wa bauxite n’uburyo yoherezwa hanze.”
