Umukecuru w’imyaka 97 witwa Guna Maya Bohara yarokowe ari muzima nyuma yo gutwarwa n’imyuzure ikomeye yibasiye Nepal. Kugeza ubu ari kwitabwaho mu bitaro, aho abaganga bavuga ko ari gukira.
Umwuzukuru we wa hafi, Dipak Bohara, yabwiye BBC Nepali ko igihe bamukuraga mu matongo yasaga n’“umurwanyi wagarutse ku rugamba amaze gutsinda.”
Uyu mukobwa Dipak yari yavuye i Kathmandu ajya gufasha mu bikorwa byo kumurokora.
Igikorwa cyo kumukura muri ibyo byondo cyamaze hafi amasaha ane, kandi hakoreshejwe imashini icukura ubutaka kugira ngo bakureho ibitaka n’imyanda yari yamupfukiranye.
Amaherezo yakuwemo ari muzima, bituma inkuru ye iba imwe mu zatanze icyizere muri iyi mpanuka ikomeye.
Iyi myuzure ikomeye yabaye ku wa 26 Kanama 2026, cyane cyane mu bice byo hagati muri Nepal hafi y’imigezi ya Bhote Koshi na Trishuli.
Amakuru y’ibanze avuga ko amazi menshi yaje mu buryo butunguranye mu ruzi rwa Bhote Koshi, aturuka mu gice cya Tibet mu Bushinwa.
Birakekwa ko byatewe no kugwa kw’urubura n’ibitare byinshi mu misozi, bishobora kuba byarabujije amazi gutambuka mu buryo busanzwe, nyuma gusandara ari menshi cyane.
Amazi, ibitaka, ibitare n’ibindi bisigazwa by’imisozi byamanutse ku muvuduko ukomeye, bisenya inzu, imihanda, ibiraro n’ibindi bikorwa remezo.
Ibice byibasiwe cyane birimo Rasuwa, Nuwakot, Dhading, Chitwan, Gorkha na Tanahun. Guverinoma ya Nepal yashyize imirenge 15 yo muri utwo turere mu bice byatangajwe ko byibasiwe n’ibiza bikomeye.
Abantu barenga 600 bamaze kubura ubuzima
Kugeza ku wa Gatandatu tariki ya 29 Kanama(8), amakuru mashya yavugaga ko abarenga 600 bamaze kwicwa n’iyi myuzure, mu gihe abantu barenga 2,400 bakomeje kubura muri Nepal no mu bice bya Tibet.
Abatabazi bakomeje gushakisha abantu bashobora kuba bakiri mu matongo cyangwa ahantu hataba imihanda.
Kugeza ubu, abarenga 3,700 bamaze gutabarwa muri Nepal, mu gihe ibihumbi by’abasirikare n’abatabazi byashyizwe mu bikorwa byo gushakisha no gutabara ababa bagihumeka.
Iyi myuzure yasenye ibice byinshi by’ibikorwa remezo. Imihanda n’ibiraro byatwawe n’amazi, bituma abaturage bo mu bice bimwe na bimwe batongera gushyikirana n’ab’ahandi.
Umuhanda uhuza Kathmandu n’ahagana ku mupaka wa Tibet na wo warangiritse cyane. Uwo muhanda ukoreshwa n’abaturage, abacuruzi ndetse n’abakerarugendo n’abasura ahantu hera, harimo n’aberekeza ku musozi wa Mount Kailash na Lake Mansarovar.
Ibibazo byo gutabara byarushijeho gukomera nyuma y’uko ibitaka n’ibindi bisigazwa bifunze igice cy’umugezi, bigakora ikiyaga gishya cyuzuyemo amazi menshi.
Amakuru avuga ko amazi y’icyo kiyaga yageze kuri miliyoni zirenga 2.5 za metero kibe, mbere y’uko atangira kurenga akinjira mu ruzi rwa Bhotekoshi.
Ibi byatumye abategetsi bagira impungenge z’uko hashobora kongera kubaho umwuzure ukomeye mu bice biri hasi y’umugezi.
Ibikorwa byo gutabara byigeze guhagarikwa mu gihe gito mu rwego rwo kwirinda icyo cyago, nyuma birakomeza.
Iyi mpanuka ntabwo yibasiye Nepal gusa. Ibice bya Tibet mu Bushinwa na byo byibasiwe cyane n’amazi n’ibitaka byamanutse mu misozi.
Ubushinwa bwashyize abakozi n’ibikoresho by’ubutabazi mu bice byibasiwe, mu gihe Ubuhinde bwohereje indege zitwara ubutabazi, itsinda ry’abahanga mu gutabara abantu ndetse n’ibikoresho byo kubaka ikiraro cy’agateganyo.
Hari kandi abanyamahanga benshi bari muri ibyo bice, bamwe muri bo bari mu ngendo zo gusura ahantu hera cyangwa gutembera mu misozi. Ibi byatumye imiryango yo mu bihugu bitandukanye ikomeza gushakisha amakuru y’ababo baburiwe irengero.
