Umunyarwandakazi Florence Niyonkuru yegukanye umudali wa Bronze mu isiganwa rya kilometero 21 (half marathon) mu Marushanwa y’Isi yo gusiganwa n’amaguru (World Athletics Road Running Championships) ari kubera i Copenhagen muri Denmark.
Yarangije ibyo bilometero ari ku mwanya wa gatatu, akoresheje isaha 1, iminota 6 n’amasegonda 8 (1:06:08), aba aciye agahigo nk’Umunyarwanda[kazi] ubigenje atyo muri iryo siganwa.
Agnes Ngetich ukomoka muri Kenya ni we wegukanye umudali wa zahabu, akoresheje 1:05:15, ari na byo byamuhesheje guca ako gahigo muri iri siganwa rikorwa n’abagore gusa.
Mugenzi we Veronica Loleo yabaye uwa kabiri akoresheje 1:06:05.
Isiganwa World Athletics Road Running Championships ritegurwa ku rwego mpuzamahanga na World Athletics ari yo mpuzamashyirahamwe iyobora umukino wo gusiganwa ku maguro ku rwego rw’isi.
Kuri iyi nshuro iri siganwa ryabereye i Copenhagen hagati ya 19–20 Nzeri, World Athletics yari ishinzwe amarushanwa, naho ibigo Danish Athletics na Sparta Athletics & Running ni bo bayateguye mu bufatanye na World Athletics, Umujyi wa Copenhagen, Sport Event Denmark na Wonderful Copenhagen.
Abatsinze bahabwa iki uretse imidali?
Hari ibintu bibiri tugomba gutandukanya:
- Umudali wa shampiyona
Abatsinze ku myanya ya mbere bahabwa zahabu, ubutare( silver) na bronze.
Abitabiriye isiganwa buri wese, harimo n’abatari mu ba mbere, bashobora guhabwa umudali w’uko barutse intera yose yari igenwe n’ubwo bataje mu ba mbere.
- Amafaranga y’ibihembo
Kuri World Athletics Road Running Championships Copenhagen 2026, nta makuru yerekeye amafaranga abatsinze bazahabwa, gusa icyo abasomyi bamenya ni uko iri siganwa ritandukanye n’andi asanzwe aho abantu bahembwa amafaranga.
Muri iri ryo, abantu bahabwa imidali nayo ifite agaciro kanini mu mafaranga no mu cyubahiro ku rwego mpuzamahanga mu bya siporo iba yakinwe.
Kuba Niyonkuru Florence yabonye umudali wa gatatu wa shampiyona y’Isi mu irushanwa nk’iri bifite agaciro mu rwego rwa siporo mpuzamahanga, kuko iri rushanwa rihuza abakinnyi baturuka mu bihugu byinshi.
Copenhagen 2026 yari ifite abakinnyi 496 ba kabuhariwe baturutse mu bihugu 85, hiyongeraho abagera ku 60,000 bitabiriye amasiganwa muri rusange.
