Ibigo by’itangazamakuru birimo CNN, Politico na MS NOW byatangaje ko biri gutegura kurega ubuyobozi bwa Donald Trump, nyuma yo kubuzwa gukorera akazi kabo muri Perezidansi ya Amerika.
Ibi bigo byavuze ko byatanze iki kirego bigamije kurengera uburenganzira bw’itangazamakuru buteganywa n’Itegeko Nshinga rya Amerika.
Ku wa Gatanu tariki ya 18 Nzeri(9) 2026, nibwo Trump yatangaje ko ahagaritse uburenganzira bwa CNN, MS NOW na Politico bwo gukorera mu Biro bye, avuga ko ibyo bitangazamakuru bikunze gutangaza “amakuru y’ibinyoma.”
Icyakora Trump ,nubwo atagaragaje inkuru cyangwa itangazo runaka ryaba ryaratangajwe n’ibi binyamakuru rikamutera gufata iki cyemezo, yavuze ko ibyo ari umusaruro w’ibyo yabonaga nk’itangazamakuru rimunenga mu gihe kirekire.
Ku wa Gatandatu, abanyamakuru b’ibi bigo binjiye muri Perezidansi barakumirwa.
The Guardian yanditse ko abanyamakuru ba CNN, MS NOW na Politico bakomeje gukorera hanze y’iyi nyubako.
Mu itangazo ryashyizwe hanze nibyo binyamakuru, kuri uyu wa Mbere italiki 21, Nzeri, 2026, CNN, Politico na MS NOW bavuze ko igihe kigeze ngo barege ubuyobozi bwa Trump kugira ngo barengere uburenganzira bwabo buteganywa n’Itegeko Nshinga, ndetse banarengere ihame rivuga ko ubutegetsi butagomba kugena ibyo itangazamakuru ritangaza.
Bavuze ko amakarita y’abanyamakuru babo yateshejwe agaciro nta nteguza cyangwa uburyo bwo kubanza kubasobanurira icyemezo.
Iki kibazo cyongeye kuzamura impaka ku mubano uri hagati y’ubutegetsi bwa Trump n’itangazamakuru.
Mbere y’ibi, ubuyobozi bwe bwari bwaranabujije abanyamakuru ba Associated Press kugera ahantu hamwe na hamwe muri Perezidansi nyuma y’amakimbirane ku izina ry’Ikigobe cya Mexico.
AP na yo yagejeje ikibazo mu nkiko, aho urubanza rugikomeje.
