Impanuka ya gari ya moshi itwara abagenzi ku muvuduko munini yabereye hafi y’umujyi wa Toledo muri Espagne mu gitondo cyo ku wa Gatatu, tariki ya 28 Ukwakira 2026, ihitana abantu nibura 64, abandi 58 barakomereka.
Abashinzwe ubutabazi mu karere ka Castilla-La Mancha batangaje ko gari ya moshi imwe yagonganye n’indi yari imbere yayo, bituma ibice byazo zombi biva ku murongo gari ya moshi isanzwe igenderaho.
Bimwe mu binyabiziga byazo byatembeye mu kabande, bikaba byongereye ubukana bw’iyi mpanuka.
Abayobozi bavuze ko umubare w’abapfuye n’abakomeretse ushobora kwiyongera.
Impamvu nyayo y’iyi mpanuka ntiyari yakamenyekana kugeza ubwo ayo makuru yatangazwaga.
Mu butumwa buri ku mbuga nkoranyambaga, ubuyobozi bwavuze ko inzego z’ubutabazi zageze ahabereye iyo mpanuka, zikorana n’inzego zose bireba ngo abagihumeka batabarwe.
Umuyobozi w’ishyaka ritavuga rumwe n’ubutegetsi ryitwa Partido Popular, Alberto Núñez Feijóo ashimangira ko icyihutirwa ari ugutabara abahuye n’impanuka no gufasha imiryango yabo.
Iri shyaka ryahagaritse ibikorwa byose byo kwiyamamaza byari biteganyijwe mu gihugu hose.
Iyi mpanuka ibaye mu gihe Espagne yiteguraga amatora y’Abadepite ateganyijwe mu mpera za Ugushyingo 2026.
The New York Times ivuga iyo mpanuka ishobora no kugira ingaruka ku biganiro bya politiki, cyane cyane ku birebana n’ubushobozi bwa Guverinoma iyobowe na Pedro Sánchez mu gucunga ibikorwa remezo n’umutekano w’abaturage.
