Sosiyete Sivili yo muri Uganda yanenze Leta ko yemeye guha buri Mudepite ibihumbi56$ ni ukuvuga miliyoni 200 z’amashilingi ya Uganda kugira ngo agure imodoka nshya.

Abagize sosiyete sivili ya Uganda bavuga ko bidakwiye ko Leta itanga amafaranga angana kuriya ngo ahabwe abantu bake mu gihe igihugu gihanganye n’ingaruka za COVID-19.

Amafaranga yose hamwe bariya badepite bazahabwa arakabakaba miliyoni 30 $.

Impirimbanyi y’uburenganzira bwa muntu yitwa Anet Nana Namata yabwiye Al Jazeera iti:  “ Ntibikwiye ko muri ibi bihe igihugu kiri mu bukene no guharanira kwivana mu ngaruka za COVID-19 ko abayobozi bigabagabanya amafaranga angana kuriya! Abaturage inzara irababaga amagara mu gihe abanyapolitiki bigabagabanya amafaranga yaturutse mu misoro y’abaturage.”

Umuturage ufite imibereho iciriritse yinjiza umushahara uri hagati ya $28 na $75 ku kwezi.

Indi mpirimbanyi y’uburenganzira bwa muntu yitwa Moses Isooba ivuga ko ikindi kibabaje ari uko abaturage muri iki gihe bisa n’aho bari gusabwa gutanga amafaranga yo gufsha Leta kugura inkingo za COVID-19.

Kuri we, ariya mafaranga yagombye gukoreshwa mu kwita ku baturage 500 000 batishoboye kurusha abandi, nabo bakabona inkingo n’ibindi bakeneye mu buzima bw’iki gihe butoroshye.

Umuvugizi wa Guverinoma ya Uganda witwa Ofwono Opondo avuga ko abo muri Sosiyete sivili bari kwigiza nkana kuko basanzwe bazi neza ko Abadepite bahabwa amafaranga yo kugura imodoka nshya zo kubafasha mu kazi.

Opondo ngo ntiyumva impamvu z’uko muri iki gihe ari bwo byabaye ikibazo.

Mu mwaka wa 2018 nabwo Abadepite bahawe ariya mafaranga ariko byarakaje abaturage bituma bamwe binjira ku ngufu mu ngoro y’Inteko ishinga amategeko ariko Polisi iza kuhabirukana ‘shishi itabona.’

Kugeza ubu Uganda ituwe n’abaturage miliyoni 45, muri bo 91,710 banduye COVID-19, ihitana abantu 2,496.

Muri miliyoni 45 z’abatuye kiriya gihugu, abagera kuri miliyoni imwe bakingiwe kiriya cyorezo.