Ubwo abacamanza bari kuburanisha abagabo bafashwe n’inzego z’umutekano za Uganda bari bagiye mu kiruhuko, aba bagabo beretse itangazamakuru ibikoreme bavuga ko batewe n’abasirikare aho bafungiwe. Bavuga ko bakorerwa iyicarubozo.
Amafoto yatangajwe na NTV ayerekana abo bagabo bari kwereka itangazamakuru ibikomere bafite mu mugongo, ku birenge n’ahandi ku mubiri.
Bari kuburanishirizwa mu rukiko ruri ahitwa Nakawa, umucamanza ukuriye Inteko iburanisha yitwa Douglas Singiza.
Tariki ya 01, Kamena, 2021 nibwo byamenyekanye ko Gen Katumba Wamala yarashwe n’abantu bari kuri moto, amasasu aramukomeretsa ariko umukobwa we ahasiga ubuzima.
Undi wahaguye ni umushoferi we.
umwe mu basirikare bakuru ba Uganda yarikotse amasasu yarashwe n’abantu bane bari bamuteze igico bari kuri moto.
Hari video icyo gihe yerekanaga aho amaraso yamenekeye.
Gen Katumba Wamala yakomeretse urutugu, hanyuma bamujyana kwa muganga ari kuri moto.
Edward Katumba Wamala ni umwe mu basirikare bakuru ba Uganda. Muri iki gihe ni Minisitiri w’umurimo n’ubwikorezi, akaba yaragiye kuri aka kazi guhera tariki 14, Ukuboza, 2010.
Mbere yari Umunyamabanga wa Leta muri iriya Minisiteri.
Yigeze kuba Umugaba mukuru w’Ingabo za Uganda guhera mu mwaka wa 2005 kugeza mu mwaka wa 2013.
Mbere y’aka kazi, Gen Edward Katumba Wamala yabaye Komiseri Mukuru wa Polisi ya Uganda.
Icyo gihe hari hagati y’umwaka wa 2001 n’umwaka wa 2005.
