Icyorezo COVID-19
Abamaze Gukingirwa COVID-19 Mu Rwanda Barenze Ibihumbi 158
Minisiteri y’Ubuzima yatangaje ko umunsi wa kabiri wo gukingira COVID-19 mu Rwanda wasojwe abakingiwe mu gihugu cyose bamaze kuba 158.898, barimo 83.842 bakingiwe kuri uyu wa Gatandatu.
Gukingira COVID-19 byatangiye ku wa Gatanu, nyuma y’uko muri iki cyumweru u Rwanda rwakiriye inkingo zikabakaba 347.000 za AstraZeneca/Oxford na Pfizer binyuze muri gahunda mpuzamahanga ya COVAX, zaje kwiyngeraho izindi 50.000 rwahawe n’u Buhinde.
Ni inkingo zishobora gukingira abantu 196.480 kubera ko umuntu agomba guhabwa urukingo inshuro ebyiri kugira ngo yizere ko yakingiwe neza. Abahawe urukingo bose bazongera guhabwa urwa kabiri nyuma y’ibyumweru bine.
Uturere tumaze gukingira abantu benshi ni Kirehe yakingiye 8.547 na Gicumbi yakingiye 8.270. Akarere kamaze gukingira bake ni Bugesera imaze gukingira abantu 4282. Abakingiwe mu Mujyi wa Kigali muri rusange ni 6062.
Ku munsi wa mbere hakingiwe abantu 75.056, hibandwa ku bafite ibyago byinshi byo kwandura cyangwa kuzahazwa n’iki cyorezo nk’abakozi bo kwa muganga, abantu bafite imyaka 65 no hejuru yayo, abafite uburwayi bwa karande cyane cyane diyabete, indwara z’umutima, indwara z’ubuhumekero n’izindi n’abafite ubumuga.
Mu bakingiwe kandi harimo abashinzwe umutekano, imfungwa n’abagororwa n’abarimu bari mu byiciro by’abarusha abandi ibyago byo kwandura COVID19. Intego ni ugukingira nibura 30% by’abarimu ibihumbi 98 u Rwanda rufite.
Leta yihaye umuhigo wo gukingira 30% by’abaturarwanda bose mbere y’uko uyu mwaka urangira na 60% mbere y’uko uwa 2022 urangira. Ivuga ko ikomeje ibiganiro n’ibindi bihugu, abakora inkingo ndetse n’abafatanyabikorwa batandukanye kugira ngo haboneke inkingo zihagije.
Kugeza kuri uyu wa Gatandatu mu Rwanda abamaze kwandura COVID-19 ni 19.509, mu bipimo bisaga 1.039.869. Abamaze kwitaba Inana ni 267, naho abakirwaye ni 1442. Abanduye ubu burwayi bamaze gukira ni 17.810 bahwanye na 91.2%.
