Menu
Indimi
Advert

Politiki

Abamotari 31 baraye bafashwe barenze bordure buri wese yaciwe Frw 150 000

Yanditswe kuwa

Mu  mugoroba wo kuri uyu wa Kane taliki 24, Ukuboza, 2020 hari abamotari polisi yafashe video barenze umuhanda ugenewe ibinyabiziga bagenda mu w’abanyamakuru kandi bitemewe. Polisi yafashemo 31, buri wese akaba agomba gucibwa amande ya FRW 150 000. Barangije umwaka nabi.

Abamotari bafashwe ni abo mu Mujyi wa Kigali. Babwiye itangazamakuru ko babikoze basiganwa n’amasaha kandi ngo kubera umuvundo w’ibinyabiziga uba mu masaha y’umugoroba bahitamo guca iy’ubusamo bakarenga bordure kandi bitemewe.

Umwe muri bo witwa Eric Nzayisenga wo mu Karere ka Gasabo avuga ko yafatiwe mu Giporoso yarenze bordure asize umugenzi hafi ya Station iri hafi aho.

Ati: “ Nafashwe ndimo guparika umugenzi, ndafatwa ndi gukora ayo makosa, ariko niko twari dusanzwe tubigenza. Hari hari umudundo w’imodoka bwari bwije  ariko ndasaba imbabazi kubera ayo makosa nakoze.”

Avuga ko yari asanzwe azi ko bibujijwe guca kuri bordure ariko ngo hari byinshi bakora bazi ko ari amakosa ariko bibuka ko ari amakosa cyane iyo Polisi ibafashe.

We na bagenzi be batakambiye Polisi bayisaba ko yadohora igaca inkoni izamba kugira ngo batarangiza umwaka nabi kandi n’ubukene bumeze nabi kubera ingaruka za COVID-19.

Umuyobozi w’Impuzamashyirahamwe y’abamotari FERWACOTAMO Bwana Ngarambe Daniel yabwiye Taarifa ko kuba abafashwe batakamba bavuga ko bakennye, ko batabona amande, ngo ni ibintu byumvikana ariko bitakuraho ko Polisi ikurikiza amategeko.

Avuga  ko bariya ba motari bagomba guhanwa kugira ngo bibere n’abandi urugero kuko bose bahora babwirwa ibibi byo kugendera kuri bordure.

Umuvugizi wa Polisi y’u Rwanda Commissioner of Police ( CP) Kabera John Bosco avuga ko igihe cyo kwigisha abamotari cyarangiye , ubu ikigomba gukorwa ari ukubahana.

Yagize ati: “ Mu gihe cya Gerayo Amahoro twigishije abamotari akamaro ko gukurikiza amategeko y’umuhanda  ariko ubu icyo turi gukora ni ‘enforcement’, ibihano twababwiye bigomba gushyirwa mu bikorwa.”

Commissioner Kabera avuga ko buri mumotari wafashwe agomba kwishyura amande ya Frw 150 000, kandi moto zabo zigafungwa.

Mu mujyi wa Kigali hari abamotari 26 000 mu gihe mu Rwanda hose hari abarenga 40 000.

Bamwe bafashwe ku mugoroba

Bemera ko basanzwe bazi ko kizira guca ahatemewe

Hafashwe moto 31

Nzayisenga na bagenzi be batakambiye Polisi ngo ireke kubaca amande

CP John Bosco Kabera yavuze ko Polisi yigishije abamotari bihagije

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement