Menu
Indimi

Mu Rwanda

Abantu 16 Basuye Uwanduye COVID-19 Bapimwe Bane Basanganwa Ubwandu

Yanditswe kuwa

Abantu 16 bo mu Mirenge itandukanye y’Akarere ka Kicukiro bafatiwe mu rugo rw’umuturage wanduye COVID-19 bagiye kumusura. Ariko n’ubwo bariya bantu bahakanye ko batari bazi ko uwo basuye yari yanduye COVID-19, bivugwa ko bari bazi ko yambaye isaha imubuza kurenga iwe, ihabwa uwanduye COVID-19.

Amakuru twamenye ni uko abantu 17 baturutse mu mirenge y’Akarere ka Kicukiro n’Akarere ka Gasabo bagiye gusura umuntu utuye mu Murenge wa Nyarugunga mu Karere ka Kicukiro.

Bamusuye kubera ko yari arwaye indwara Polisi ivuga ko ari COVID-19.

Bamaze kugera yo ngo barasabana amasaha aricuma biza kugoroba ndetse n’ijoro riragwa kugeza saa sita z’ijoro ubwo Polisi yabafataga nyuma y’amakuru yahawe n’abaturanyi.

Kubera ko bwari bwije, abafashwe barajwe ‘ahabigenewe’, mu gitondo bapimwe ubwandu bwa COVID-19 basanga bane muri bo bayanduye.

Uwo bari basuye we yagumijwe iwe kuko n’ubundi yari yarasabwe kuguma yo akaba ari ho yitabwaho ari.

Babyita Home-based COVID medical care.

Umuvugizi wa Minisiteri y’ubuzima, Julien Mahoro Niyingabira avuga ko n’ubwo abandi bari kumwe na bariya bane nta bwandu bwabagaragayeho ubwo bapimwaga, ariko ntawabura kubicyenga kuko ibimenyetso bya  COVID-19 bigenda bikura’.

Umuvugizi wa Minisiteri y’ubuzima, Julien Mahoro Niyingabira

Yibukije abantu ko kwikingiza COVID-19 ari ingirakamaro kuko uwamaze kwikingiza inkingo zombi aba afite amahirwe yo kutarembywa n’icyorezo cyangwa ngo kimwice.

Gusa ngo gukingirwa ntibibuza uwandura kwandura!

Abo byahamye ko banduye, bahise bajyanwa ku bitaro by’i Kanyinya mu Murenge wa Kigali, Akarere ka Nyarugenge.

Ku rubuga rwa Polisi y’u Rwanda handitseho ko umwe mu bafashwe yemeye ko bakoze amakosa bakarenga ku mabwiriza yo kurwanya icyorezo cya COVID-19.

Ngo ntibari bazi ko uwo bagiye gusura yari yaranduye COVID-19!

Umuvugizi wa Polisi y’u Rwanda, Commissioner of Police (CP) John Bosco Kabera yashimiye abaturage bagize uruhare mu gutuma bariya bantu bafatwa.

Yagize ati” Hari abantu badohotse ku ngamba zo kwirinda icyorezo cya COVID-19 bagakomeza guteza abandi ibibazo, ariko hari n’abandi bakomeza kuduha amakuru y’abarenga ku mabwiriza kandi turabashimira.”

Umuvugizi wa Polisi y’u Rwanda CP John Bosco Kabera

CP Kabera yaburiye Abanyarwanda badakurikiza amabwiriza yo kwirinda kiriya cyorezo nk’uko yagenwe, avuga ko imyitwarire nk’iriya ishobora gutuma Guverinoma ifata  ‘izindi ngamba zikomeye.’

Tanga igitekerezo

Tanga igitekerezo

Your email address will not be published.

Advertisement

English Version

Advertisement
WeCreativez WhatsApp Support
Mutwandikire turabasubiza
Twandikire