Nyuma kuva gusura Urwibutso rwa Jenoside yakorewe Abatutsi, Lt Gen Muhoozi Kainerugaba yahise akomereza muri Kigali Arena aho yerekaniye ubuhanga bwe mu gukina Basketball.
Hari amafoto yagaragaye ari gutera umupira mu nkangara abandi bakinnyi ba Basketball bateramo iyo bashaka gutsinda ibitego.
Mu masaha ya mu gitondo kuri uyu wa Kabiri yari yasuye urwibutso rwa Jenoside yakorewe Abatutsi ruri ku Gisozi mu Karere ka Gasabo avuga ko ibyahabereye bidakwiye kuzongera kuba ukundi.
Yashimye Leta y’u Rwanda ko yashyizeho inzibutso kugira ngo zizafashe ibisekuru bizaza kumenya ko mu Rwanda higeze kuba Jenoside yakorewe Abatutsi bityo birinde icyayiteye.
Nyuma y’igihe gito yari amaze avuye mu Rwanda guhura na Perezida warwo Paul Kagame, Lt Gen Muhoozi Kainerugaba kuri uyu wa Mbere taliki 15, Werurwe, 2022 yagarutse mu Rwanda kuganira nawe ku zindi ngingo zirebana no kunoza umubano hagati y’u Rwanda na Uganda.
Lt Gen Muhoozi Kainerugaba ni umuhungu wa Perezida Museveni, umujyanama we mu bya gisirikare ndetse akaba ari nawe Mugaba w’ingabo za Uganda zirwanira ku butaka.
Ubwo yageraga ku kibuga cy’indege i Kanombe, kuri uyu wa Mbere yakiriwe na bamwe mu basirikare bakuru mu ngabo z’u Rwanda.
