Ni imibare yakusanyijwe n’ikigo CIES Football Observatory, gikurikirana ibijyanye n’umupira w’amaguru.
Manchester City iza ku mwanya wa mbere nyuma y’uko muri uyu mwaka yaguze Jack Grealish muri Aston Villa, watanzweho miliyoni 116 z’amayero.
Ku mwanya wa kabiri haza Manchester United nayo yo mu Bwongereza, abakinnyi bayo bahagaze miliyari €1.02.
Iyi kipe muri uyu mwaka yaguze Jadon Sancho muri Borussia Dortmund kuri miliyoni €85 , Raphael Varane kuri miliyoni €39 na Cristiano Ronaldo kuri miliyoni €22.
Ikinyuranyo hagati y’aya makipe cyagabanyutse cyane muri uyu mwaka w’imikino wa 2021/22 ugereranyije n’ushize, kiva kuri miliyoni €192 kigera kuri miliyoni €57.
Izo kipe ni zo zonyine zimaze kurenza miliyari y’amayero mu kugura abakinnyi zifite.
Paris St-Germain iza ku mwanya wa gatatu aho yakoresheje miliyoni €939 mu kugura abakinnyi ifite, zazamutseho miliyoni €51 ugereranyije n’amafaranga ikipe yabarirwaga mu mwaka ushize w’imikino.
Ku mwanya wa kane haza Real Madrid ifite abakinnyi ba miliyoni €787 (zazamutseho miliyoni €79), ku wa gatanu haza Chelsea yakoresheje miliyoni €780, zazamutseho miliyoni €17 ugereranyije n’uko byari byifashe mu mwaka ushize.
Ku rutonde rw’amakipe afite agaciro karengeje miliyoni €500 hariho andi atatu yo mu Bwongereza ari yo Liverpool, Arsenal na Tottenham.
Andi ari muri icyo cyiciro ni Barcelona na Juventus.
